హిందీలో ‘అరుంధతి’ రీమేక్.. అనుష్క పాత్రలో ఈమెనా? ఓ మై గాడ్

అనుష్క కెరీర్ గురించి మాట్లాడాలంటే ‘అరుంధతి’కి ముందు ‘అరుంధతి’ తర్వాత అని చెప్పుకోవాలి. స్వీటీ కెరీర్‌ను ఎవరెస్ట్‌ను ఎక్కించిన సినిమా ఇది. దివంగత దర్శకుడు కోడి రామకృష్ణ తెరకెక్కించిన ఈ బ్లాక్ బస్టర్ సినిమాను హిందీలో రీమేక్ చేయబోతున్నారట. ఈ మేరకు బాలీవుడ్‌లో జోరుగా ప్రచారం జరుగుతోంది. అయితే అనుష్క పాత్రలో ఎవరు నటింబోతున్నారో తెలుసా? బాలీవుడ్ బెబో కరీనా కపూర్ ఖాన్. అవును.. బాలీవుడ్‌లో అరుంధతి రీమేక్‌కు చర్చలు జరుగుతున్నాయి. కరీనాతో పాటు అనుష్క శర్మ పేరు కూడా చర్చల్లో ఉందట. ఇద్దరు ప్రముఖ నిర్మాతలు అరుంధతి రీమేక్ హక్కులను కొనుక్కుకున్నారట.

దాదాపు పదేళ్ల తర్వాత అరుంధతి సినిమాకు రీమేక్ రాబోతోంది. ప్రధాన పాత్రలో అనుష్క శర్మను కానీ కరీనా కపూర్‌ను కానీ ఎంపిక చేసుకోవాలని అనుకుంటున్నారు. ఒకవేళ కరీనా డేట్లు కుదరకపోతే అనుష్కను తీసుకుంటారు. కానీ మొదటి ప్రాధాన్యత మాత్రం కరీనాకే’ అని విశ్వసనీయ వర్గాలు వెల్లడించాయి. ‘అరుంధతి’ సినిమాకు గానూ అనుష్క దాదాపు ఏడు కేటగిరీల్లో అవార్డులు అందుకున్నారు. సినిమాలో సోనూ సూద్, అర్జన్ బాజ్వా, మనోరమ, సయాజీ షిండే కీలక పాత్రలు పోషించారు. 2009లో విడుదలైన ఈ సినిమా అనుష్కను ఓవర్‌నైట్ స్టార్‌ను చేసేసింది.

ఇక్కడ మీరు మరో ఆసక్తికరమైన విషయం తెలుసుకోవాలి. తొలుత ‘అరుంధతి’ సినిమా కోసం మంచు లక్ష్మిని ఎంచుకోవాలని అనుకున్నారు. కానీ కొన్ని కారణాల వల్ల ఆమెతో సినిమా తీయడం కుదరలేదు. అందుకే అనుష్కను ఎంపిక చేసుకున్నారు. ప్రస్తుతం ఈ సినిమాకు సీక్వెల్ కూడా తెలుగులో సిద్ధమవుతోంది. సీక్వెల్‌లో అనుష్క పాత్రలో పాయల్ రాజ్‌పుత్‌ను ఎంపిక చేసుకున్నారు. ఒక సినిమా మంచి విజయం అందుకుంటే దానికి సీక్వెల్ తీయడం లేదీ రీమేక్ చేయడం సర్వ సాధారణమే. కానీ చాలా తక్కువ సందర్భాల్లో అవి విజయం సాధిస్తుంటాయి. బ్లాక్ బస్టర్ హిట్ అందుకున్న అన్ని సినిమాల సీక్వెల్స్ అదే స్థాయిలో హిట్ అందుకుంటాయని చెప్పలేం. ఇందుకు ‘మన్మథుడు 2’ సినిమానే నిదర్శనం.

అలాంటిది.. అరుంధతి లాంటి సినిమాను ఏకంగా హిందీలోనే రీమేక్ చేస్తారని వార్తలు వస్తున్నాయి. కరీనా కపూర్, అనుష్క శర్మలాంటి హీరోయిన్లను జేజెమ్మ పాత్రలో ఊహించుకోలేం. ఎందుకంటే ఆ పాత్రకు ఓ హుందాతనం ఉంది. కరీనా, అనుష్క గ్లామర్ పాత్రలతోనే ఇప్పటివరకు ఆకట్టుకున్నారు. కాబట్టి వారితో కొత్త క్యారెక్టర్స్‌ చేయించి సినిమా ఒరిజినాలిటీని దెబ్బతీయకూడదు. ఒకవేళ నిజంగానే అరుంధతి సినిమాను హిందీలో రీమేక్ చేయాలనుకుంటే దీపిక పదుకొణెతో తీయొచ్చు. ఎందుకంటే రాణి పాత్రలకు దీపిక 100 పర్సెంట్ యాప్ట్ అవుతారు. మరి దర్శక, నిర్మాతలు ఏ నిర్ణయం తీసుకుంటారో చూడాలి.

error: Content is protected !!