Tapala chekkalu recipe :పాత కాలం నాటి రెసిపీ తపాలా చెక్కలు ..తక్కువ నూనెతో.. ఆరోగ్యకరంగా..

Tapala chekkalu recipe :పాత కాలం నాటి రెసిపీ తపాలా చెక్కలు ..తక్కువ నూనెతో.. ఆరోగ్యకరంగా.. తపాలా చెక్కలు, తెలంగాణలో ‘సర్వపిండి’గా పిలిచే ఈ వంటకం, సరైన కొలతలతో చేస్తే అద్భుతమైన రుచిని ఇస్తుంది. ప్రాంతాన్ని బట్టి పదార్థాలు, తయారీ విధానం కొంచెం మారినా, రుచి మాత్రం దాదాపు ఒకేలా ఉంటుందని చాలామంది అంటారు. మరి, ఈ సులభమైన తపాలా చెక్కలను ఎలా తయారు చేయాలో చూద్దాం.

కావలసిన పదార్థాలు:
– పొడి బియ్యం పిండి – 2 కప్పులు
– పెసరపప్పు – 1/4 కప్పు
– శనగపప్పు – 1/4 కప్పు
– మినప్పప్పు – 1/4 కప్పు
– ఉల్లిపాయ – 1 (సన్నగా తరిగినది)
– పచ్చిమిర్చి – 2 (ముక్కలుగా తరిగినవి)
– కరివేపాకు – 2 రెమ్మలు
– కొత్తిమీర తరుగు – కొద్దిగా
– ఉప్పు, కారం – రుచికి సరిపడా

తయారీ విధానం:

1. ముందుగా ఒక గిన్నెలో పెసరపప్పు, శనగపప్పు, మినప్పప్పు తలా 1/4 కప్పు తీసుకొని, శుభ్రంగా కడిగి, అరగంట పాటు నీటిలో నానబెట్టాలి.

2. మరొక గిన్నెలో 2 కప్పుల పొడి బియ్యం పిండి తీసుకోండి. అందులో తరిగిన ఉల్లిపాయ, పచ్చిమిర్చి, కరివేపాకు, కొత్తిమీర, రుచికి సరిపడా ఉప్పు, కారం వేసి బాగా కలపండి. తర్వాత నానబెట్టిన పప్పులను వేసి మరోసారి కలుపుకోండి.

3. ఇప్పుడు కొద్దికొద్దిగా నీరు జోడిస్తూ, చపాతీ పిండిలా మెత్తగా కలిపి పిండిని తయారు చేయండి. ఈ పిండిని చిన్న చిన్న ఉండలుగా తీసుకొని, ప్లాస్టిక్ కవర్‌పై వేసి చిన్న తపాలా చెక్కల ఆకారంలో చేసుకోండి.

4. స్టవ్ వెలిగించి, కడాయిలో 1 టేబుల్ స్పూన్ నూనె వేసి వేడి చేయండి. నూనె వేడెక్కిన తర్వాత, తయారు చేసిన తపాలా చెక్కను వేసి వేయించండి. ఈ చెక్కలు ఎర్రగా, క్రిస్పీగా వేగడానికి కొంత సమయం పడుతుంది కాబట్టి, మీడియం మంటపై నిదానంగా వేయించండి.

5. బంగారు ఎరుపు రంగులో క్రిస్పీగా వేగిన తపాలా చెక్కలను ప్లేట్‌లోకి తీసుకోండి. మిగిలిన పిండితో కూడా ఇలాగే చెక్కలు చేసి వేయించుకోండి.

చల్లని సాయంత్రం వేళ, వేడివేడిగా ఈ తపాలా చెక్కలు తింటే క్రిస్పీగా, అద్భుతమైన రుచితో ఆనందిస్తారు. తక్కువ నూనెతోనే ఈ చెక్కలను రుచిగా తయారు చేయవచ్చు.