Semiya Rava dosa:కేవలం 15 నిమిషాల్లోనే ఈ కొలతలతో పిండి కలిపితే “రవ్వ సేమియా క్రిస్పీ దోశ” సూపర్ గా ఉంటుంది
Semiya Rava dosa:దక్షిణ భారతదేశంలో ఉదయం ఏ హోటల్కు వెళ్లినా లభించే ప్రముఖ ఆహారం దోశ. చాలామంది తమ ఇళ్లలో ఉదయం అల్పాహారంగా దోశనే తయారు చేస్తారు. క్రీస్తుశకం 1వ శతాబ్దానికి చెందిన తమిళ సాహిత్యంలో దోశను పోలిన వంటకం గురించి ప్రస్తావనలు ఉన్నాయి.
చరిత్రకారుడు పి. తంకప్పన్ నాయర్ ప్రకారం, కర్ణాటకలోని ఉడుపి పట్టణంలో దోశ ఉద్భవించిందని చెబుతారు. దోశ తినని తెలుగువారు దాదాపు ఉండరు. అయితే, దోశలో ఎన్నో రకాలు ఉన్నాయి—నీర్ దోశ, అడై దోశ, ఎగ్ దోశ, నెయ్యి దోశ, పేపర్ దోశ, పనీర్ దోశ, చీజ్ దోశ, మసాలా దోశ, రవ్వ దోశ, ఆనియన్ దోశ, పెసర దోశ ఇలా అనేక రకాలు.
సేమియాతో చేసే దోశ ఎప్పుడైనా రుచి చూశారా? సేమియా దోశ అనేది తక్షణమే తయారు చేసుకోగలిగిన వంటకం. ఇది సేమియా, రవ్వ, బియ్యపు పిండితో తయారవుతుంది. దీన్ని చాలా త్వరగా, సులభంగా చేసుకోవచ్చు, పైగా పులియబెట్టనవసరం లేదు. ఉదయం అల్పాహారంగా లేదా రాత్రి భోజనంగా కూడా ఇది గొప్ప ఎంపిక. సేమియా దోశ తయారీకి కావాల్సిన పదార్థాలు, తయారీ విధానం ఇక్కడ చూడండి.
సేమియా దోశ తయారీకి కావాల్సిన పదార్థాలు:
– సేమియా – అర కప్పు
– రవ్వ – అర కప్పు
– బియ్యపు పిండి – అర కప్పు
– ఉల్లిపాయ – 1 (తరిగినది)
– పచ్చిమిర్చి – 1 టేబుల్ స్పూన్ (తరిగినవి)
– జీలకర్ర – 1 టేబుల్ స్పూన్
– ఉప్పు – రుచికి సరిపడా
– నీరు – 4 కప్పులు
– కరివేపాకు – కొద్దిగా
– టమాటో – 1 (తరిగినది)
– క్యారెట్ – 1 (తురిమినది)
– అల్లం – కొద్దిగా (తరిగినది)
– కొత్తిమీర – కొద్దిగా (తరిగినది)
– నూనె – అవసరానికి తగినంత
సేమియా దోశ తయారీ విధానం:
1. ముందుగా స్టవ్ మీద కడాయి పెట్టి, సేమియాను నూనె లేకుండా వేయించుకోవాలి. లేత గోధుమ రంగు వచ్చే వరకు వేయించి పక్కన పెట్టుకోవాలి.
2. ఒక గిన్నెలో వేయించిన సేమియా, బియ్యపు పిండి, రవ్వ, జీలకర్ర, ఉప్పు వేసి, 4 కప్పుల నీరు పోసి బాగా కలపాలి. గిన్నెకు మూత పెట్టి పావుగంట పక్కన ఉంచాలి.
3. పావుగంట తర్వాత, గిన్నెలో తరిగిన ఉల్లిపాయ, పచ్చిమిర్చి, టమాటో, అల్లం, కొత్తిమీర, కరివేపాకు, తురిమిన క్యారెట్ వేసి బాగా కలపాలి.
4. స్టవ్ మీద దోశ పెనం పెట్టి వేడి చేయాలి. పెనం వేడెక్కిన తర్వాత, కలిపిన పిండిని గరిటెతో తీసి దోశలా పోసుకోవాలి. పైన కొద్దిగా నూనె చల్లి, రెండు వైపులా బంగారు రంగు వచ్చే వరకు కాల్చాలి.
5. బాగా కాలిన తర్వాత దోశను పెనం నుండి తీసేయాలి. అంతే, సేమియా దోశ సిద్ధం! ఇష్టమైన చట్నీతో దీనిని ఆస్వాదించవచ్చు.