TOMATO PARATHA:పిల్లలు ఎంతో ఇష్టంగా తినే “టమాటో పరాటా’ ఇలా సులభంగా చేసేయండి..

TOMATO PARATHA:మీరెప్పుడైనా టమాటో పరాటా రుచి చూశారా? సాధారణ చపాతీలు, పరాటాలకు బదులుగా ఈ టమాటో పరాటాను ఒకసారి ప్రయత్నించండి. ఇది రుచికరంగా ఉండటమే కాకుండా ఆరోగ్యానికి కూడా చాలా మేలు చేస్తుంది.

ఉదయం అల్పాహారంగా లేదా మధ్యాహ్న భోజనంలో తినడానికి ఇది గొప్ప ఎంపిక. టమాటాలు, గోధుమ పిండితో తయారుచేసే ఈ పరాటాలు పోషకాలతో నిండి ఉంటాయి. వీటిని తయారు చేయడం కూడా చాలా సులభం. ఇంట్లోనే టమాటో పరాటా తయారు చేసుకోవడానికి కావాల్సిన పదార్థాలు, తయారీ విధానం ఇక్కడ చూడండి.

టమాటో పరాటా తయారీకి కావాల్సిన పదార్థాలు:

గోధుమ పిండి
టమాటాలు
అల్లం
వెల్లుల్లి
పచ్చిమిరపకాయలు
సోంపు
వాము
కొత్తిమీర
ఉప్పు
నూనె
టమాటో పరాటా తయారీ విధానం:

ముందుగా మిక్సీ జార్‌లో 2 టమాటాలను (పెద్ద ముక్కలుగా కట్ చేసి), 2 పచ్చిమిరపకాయలు, అర ఇంచు అల్లం, 5 వెల్లుల్లి రెబ్బలు, పావు టీస్పూన్ సోంపు వేసి, నీళ్లు జోడించకుండా మెత్తగా పేస్ట్‌లా గ్రైండ్ చేయండి.
ఈ టమాటో పేస్ట్‌ను ఒక ప్లేట్‌లోకి తీసుకొని, అందులో కొంచెం కొత్తిమీర (తరిగినది), రుచికి సరిపడా ఉప్పు, రెండు చిటికెల వాము వేసి బాగా కలపండి.
ఈ మిశ్రమంలో 1½ కప్పుల గోధుమ పిండి వేసి, 1 టీస్పూన్ నూనె జోడించి 4-5 నిమిషాలు బాగా కలిపి పిండిలా వత్తుకోండి. ఆ తర్వాత తడి గుడ్డతో కప్పి 10 నిమిషాలు పక్కన పెట్టండి.
పిండి మీద కొద్దిగా పొడి పిండి చల్లి, చిన్న చిన్న ఉండలుగా తీసుకొని పరాటాలుగా చేతులతో వత్తుకోండి.
స్టవ్ ఆన్ చేసి, పెనం వేడి చేయండి. పెనం బాగా కాగిన తర్వాత, వత్తుకున్న పరాటాలను ఒక్కొక్కటిగా వేసి, రెండు వైపులా 1 టీస్పూన్ నూనె వేస్తూ బంగారు రంగు వచ్చే వరకు కాల్చండి.
అంతే! టమాటో పరాటా రెడీ. దీన్ని పెరుగుతో లేదా ఏ కూరతోనైనా తినవచ్చు, లేదా అలాగే తిన్నా చాలా రుచిగా ఉంటుంది.