Gongura Karam Podi:అసలైన “గోంగూర కారంపొడి”..అన్నం,టిఫిన్స్ లోకి సూపర్ టేస్ట్..

Gongura Karam Podi:అసలైన “గోంగూర కారంపొడి”..అన్నం,టిఫిన్స్ లోకి సూపర్ టేస్ట్.. గోంగూర మనకు అందుబాటులో ఉన్న ఆకుకూరలలో ఒకటి, ఇందులో అనేక పోషకాలు ఉంటాయి. ముఖ్యంగా గోంగూరలోని ఐరన్ రక్తహీనత సమస్యను తగ్గించి, రక్తం బాగా తయారయ్యేలా చేస్తుంది. అలాగే, ఇందులో ఉండే కాల్షియం ఎముకలను దృఢంగా, ఆరోగ్యంగా ఉంచుతుంది. గోంగూర వల్ల ఇంకా ఎన్నో ఆరోగ్య ప్రయోజనాలు కలుగుతాయి.

సాధారణంగా గోంగూరను చాలా మంది పప్పు లేదా పచ్చడి రూపంలో తింటారు, కానీ ఇవి ఒకటి లేదా రెండు రోజులకు మించి నిల్వ ఉండవు. అయితే, గోంగూరతో కారం పొడి తయారు చేస్తే, ఎక్కువ రోజులు నిల్వ ఉంటుంది. దీనితో ఎప్పుడు కావాలంటే అప్పుడు గోంగూర రుచిని ఆస్వాదించవచ్చు మరియు దాని ఆరోగ్య ప్రయోజనాలను పొందవచ్చు. ఇప్పుడు గోంగూర కారం పొడిని ఎలా తయారు చేయాలో తెలుసుకుందాం.

గోంగూర కారం పొడి తయారీకి కావలసిన పదార్థాలు:
గోంగూర ఆకులు – 4 కప్పులు
ఆవాలు, జీలకర్ర, ధనియాలు – పావు కప్పు చొప్పున
వెల్లుల్లి – 4 రెబ్బలు
ఎండు మిర్చి – 12
మినపప్పు – అర కప్పు
శనగపప్పు – అర కప్పు
మెంతులు – 1 టీస్పూన్
ఉప్పు – రుచికి సరిపడా
నూనె – 2 టీస్పూన్లు

తయారీ విధానం:
ఒక బాణలిలో ఆవాలు, జీలకర్ర, ధనియాలు, మెంతులు వేసి వేయించి పక్కన పెట్టుకోవాలి.అదే బాణలిలో శనగపప్పు, మినపప్పు, వెల్లుల్లి రెబ్బలు, ఎండు మిర్చి వేసి వేయించి పక్కన పెట్టుకోవాలి.ఇప్పుడు బాణలిలో నూనె వేసి, గోంగూర ఆకులను వేసి సిమ్‌లో వేయించాలి.

మిక్సీలో ముందుగా ఆవాలు, జీలకర్ర, ధనియాలు, మెంతులు వేసి ఒకసారి పొడి చేయాలి.తర్వాత శనగపప్పు, మినపప్పు, వెల్లుల్లి, ఎండు మిర్చి, ఉప్పు వేసి మరోసారి కచ్చాపచ్చాగా పొడి చేయాలి.చివరగా, వేయించిన గోంగూర ఆకులను వేసి మరోసారి మిక్సీలో పొడి చేయాలి.

ఇలా చేయడం వల్ల రుచికరమైన గోంగూర కారం పొడి సిద్ధం అవుతుంది.ఈ గోంగూర కారం పొడిని అన్నం, ఇడ్లీ, దోసెలతో తింటే చాలా రుచిగా ఉంటుంది. అన్నం మొదటి ముద్దలో దీన్ని తినడం వల్ల ఆరోగ్య ప్రయోజనాలు కూడా కలుగుతాయి.