Palak Pulao:”పాలకూర పులావ్” నిమిషాల్లో లంచ్ బాక్స్ లోకి ఇలా రుచిగా చేయండి.. సూపర్ గా ఉంటుంది
Palak Pulao:పాలకూరను ఉపయోగించి మనం వివిధ రకాల రుచికరమైన వంటలను తయారు చేస్తాం. ఆహారంలో పాలకూరను చేర్చడం వల్ల అనేక ఆరోగ్య ప్రయోజనాలు కలుగుతాయి. సాధారణంగా పాలకూరతో పప్పు, రైస్, పాలక్ పనీర్ వంటి వంటకాలను ఎక్కువగా తయారు చేస్తాం. అయితే, పాలకూరతో రుచికరమైన పులావ్ కూడా తయారు చేయవచ్చు. ఇప్పుడు పాలక్ పులావ్ తయారీ విధానాన్ని తెలుసుకుందాం.
పాలక్ పులావ్ తయారీకి కావలసిన పదార్థాలు:
తరిగిన పాలకూర – 250 గ్రాములు
నానబెట్టిన బియ్యం – 2 కప్పులు
పచ్చిమిర్చి – 4
అల్లం ముక్కలు – 2 (మధ్యస్థ పరిమాణం)
వెల్లుల్లి రెబ్బలు – 4
నూనె – 1 టేబుల్ స్పూన్
నెయ్యి – 1 టేబుల్ స్పూన్
లవంగాలు – 3
సాజీరా – 1 టీ స్పూన్
బిర్యానీ ఆకు – 2
దాల్చిన చెక్క – 2
మిరియాలు – 1/2 టీ స్పూన్
జీడిపప్పు – 1 టేబుల్ స్పూన్
పొడవుగా తరిగిన ఉల్లిపాయ – 1 (పెద్దది)
క్యారెట్ తురుము – 1 కప్పు
తరిగిన కొత్తిమీర – 1 కప్పు
గరం మసాలా – 1/4 టీ స్పూన్
నీళ్లు – 3 కప్పులు
ఉప్పు – రుచికి సరిపడా
పాలక్ పులావ్ తయారీ విధానం:
ముందుగా ఒక మిక్సీ జార్లో అల్లం, వెల్లుల్లి, పచ్చిమిర్చిని వేసి మెత్తని పేస్ట్లా చేయాలి.ఒక కుక్కర్లో నూనె, నెయ్యి వేసి వేడి చేసిన తర్వాత లవంగాలు, సాజీరా,
బిర్యానీ ఆకు, దాల్చిన చెక్క, మిరియాలు, జీడిపప్పు వేసి వేయించాలి.
తర్వాత పొడవుగా తరిగిన ఉల్లిపాయలను వేసి బంగారు రంగు వచ్చే వరకు వేయించాలి.ఉల్లిపాయలు వేగిన తర్వాత ముందుగా తయారు చేసిన అల్లం-పచ్చిమిర్చి పేస్ట్ను వేసి బాగా కలపాలి.ఆ తర్వాత క్యారెట్ తురుము, తరిగిన పాలకూరను వేసి బాగా వేయించాలి.
పాలకూర పూర్తిగా ఉడికిన తర్వాత, నానబెట్టిన బియ్యం, తరిగిన కొత్తిమీర, గరం మసాలా వేసి కలపాలి.తర్వాత 3 కప్పుల నీళ్లు, రుచికి సరిపడా ఉప్పు వేసి కలిపి, 5 నిమిషాల పాటు ఉడికించి, మూత పెట్టి 2 విజిల్స్ వచ్చే వరకు ఉడికించాలి.
ఇలా చేయడం వల్ల రుచికరమైన పాలక్ పులావ్ సిద్ధమవుతుంది. ఈ పులావ్ను సాధారణ బియ్యం లేదా బాస్మతి బియ్యంతో తయారు చేయవచ్చు. దీన్ని నేరుగా లేదా రైతాతో కలిపి తింటే చాలా రుచిగా ఉంటుంది.
పాలకూర ఆరోగ్య ప్రయోజనాలు:
పాలకూరను ఆహారంలో తరచూ చేర్చుకోవడం వల్ల అనేక ఆరోగ్య ప్రయోజనాలు కలుగుతాయి. ఇందులోని అధిక ఫైబర్ అజీర్తి సమస్యలను తగ్గిస్తుంది. రక్తపోటును నియంత్రణలో ఉంచడంలో సహాయపడుతుంది. చర్మ ఆరోగ్యాన్ని మెరుగుపరచడంతో పాటు చర్మానికి నిగారింపును అందిస్తుంది.
కంటి చూపును మెరుగుపరచడంలో, శరీరంలో రోగ నిరోధక శక్తిని పెంచడంలో కూడా పాలకూర ఉపయోగపడుతుంది. అందుకే ఈ విధంగా పాలకూరను తరచూ తినడం వల్ల రుచితో పాటు ఆరోగ్య ప్రయోజనాలు కూడా పొందవచ్చు.