మీ ఫోన్ హ్యాక్ అయిందా? ‘గ్రీన్ డాట్’ వస్తే వెంటనే ఇలా చెక్ చేయండి!

స్మార్ట్‌ఫోన్ మన జీవితంలో ఒక భాగమైపోయింది. బ్యాంకు పనుల నుంచి పర్సనల్ ఫోటోల వరకు అన్నీ అందులోనే ఉంటున్నాయి. అయితే, ఎవరైనా మీ ఫోన్‌ను సీక్రెట్‌గా స్పై (Spy) చేస్తున్నారేమో అన్న అనుమానం మీకు ఎప్పుడైనా వచ్చిందా?

మీ మాటలు ఎవరైనా వింటున్నారా? ఈ భయాలను పోగొట్టడానికే స్మార్ట్‌ఫోన్లలో ఇప్పుడు ఒక కొత్త ఫీచర్ వస్తోంది. అదే ‘గ్రీన్ డాట్’ (Green Dot).

మీ మొబైల్ స్క్రీన్ పైన, కుడివైపు మూలలో అప్పుడప్పుడూ ఒక చిన్న ఆకుపచ్చ రంగు చుక్క కనిపిస్తూ ఉంటుంది కదా! అసలు ఆ గ్రీన్ డాట్ ఎందుకు వస్తుంది? దాని అర్థం ఏంటి? ఇప్పుడే తెలుసుకోండి.

గ్రీన్ డాట్ (Green Dot) అంటే ఏమిటి?
ఆండ్రాయిడ్ (Android), ఆపిల్ (iOS) ఫోన్లలో యూజర్ల ప్రైవసీని కాపాడటానికి ఈ గ్రీన్ డాట్ లేదా ఆరెంజ్ డాట్ ఫీచర్‌ను తీసుకొచ్చారు. మీ ఫోన్‌లోని ఏదైనా అప్లికేషన్ (App) మీ ఫోన్ కెమెరా (Camera) లేదా మైక్రోఫోన్ (Microphone) వాడుకుంటున్నప్పుడు మీకు అలర్ట్ చేయడానికి ఈ డాట్ కనిపిస్తుంది.

కెమెరా వాడుతున్నప్పుడు: స్క్రీన్ పైభాగంలో ఆకుపచ్చ రంగులో డాట్ కనిపిస్తుంది.

మైక్రోఫోన్ వాడుతున్నప్పుడు: కొన్నిసార్లు మైక్ సింబల్ లేదా ఆకుపచ్చ/ఆరెంజ్ రంగు డాట్ కనిపిస్తుంది.

ఎప్పుడు జాగ్రత్త పడాలి?
మీరు వాట్సాప్ వీడియో కాల్ మాట్లాడుతున్నప్పుడు, కెమెరాతో ఫోటోలు తీస్తున్నప్పుడు లేదా ఇన్‌స్టాగ్రామ్‌లో రీల్స్ చేస్తున్నప్పుడు ఈ గ్రీన్ డాట్ రావడం చాలా సాధారణం. ఎందుకంటే ఆ సమయంలో మీరు ఆ యాప్స్‌కి కెమెరా, మైక్ పర్మిషన్ ఇచ్చి ఉంటారు.

కానీ… మీరు ఫోన్ వాడకుండా పక్కన పెట్టినప్పుడు, లేదా కేవలం న్యూస్ చదువుతున్నప్పుడు, వీడియోలు చూస్తున్నప్పుడు కూడా పైన ‘గ్రీన్ డాట్’ కనిపిస్తుందంటే మాత్రం మీ ఫోన్ ప్రమాదంలో ఉన్నట్లే.

మీ ప్రమేయం లేకుండానే బ్యాక్‌గ్రౌండ్‌లో ఏదో ఒక యాప్ మీ వాయిస్ రికార్డ్ చేస్తోందని లేదా కెమెరాతో మీ కదలికలను గమనిస్తోందని అర్థం చేసుకోవాలి.

ఏ యాప్ స్పై చేస్తుందో కనిపెట్టడం ఎలా?
మీకు తెలియకుండా మీ మొబైల్ కెమెరా, మైక్‌ని ఏ యాప్ వాడుతుందో కనిపెట్టడం చాలా సులభం:

నోటిఫికేషన్ ప్యానెల్ (Notification Panel): స్క్రీన్ పైనుంచి కిందకు స్వైప్ చేయండి. అక్కడ పైన కనిపిస్తున్న గ్రీన్ డాట్ మీద లేదా కెమెరా/మైక్ ఐకాన్ మీద క్లిక్ చేస్తే.. ఆ క్షణంలో ఏ యాప్ వాటిని ఉపయోగిస్తుందో స్క్రీన్ మీద స్పష్టంగా కనిపిస్తుంది.

ప్రైవసీ డాష్‌బోర్డ్ (Privacy Dashboard): మీ ఫోన్ సెట్టింగ్స్ లోకి వెళ్ళండి. అందులో Settings > Privacy > Privacy Dashboard (లేదా Permission Manager) ఓపెన్ చేయండి. గత 24 గంటల్లో ఏయే యాప్స్ మీ కెమెరా, మైక్, లొకేషన్‌ను ఎన్నిసార్లు వాడాయో పూర్తి లిస్ట్ అక్కడ ఉంటుంది.

మీ ఫోన్‌ను ఎలా సురక్షితంగా ఉంచుకోవాలి?
పర్మిషన్స్ తీసేయండి: ప్రైవసీ డాష్‌బోర్డ్‌లో మీకు అనుమానం ఉన్న యాప్ (ఉదాహరణకు: ఏదైనా కాలిక్యులేటర్ లేదా గేమింగ్ యాప్ కెమెరా పర్మిషన్ అడిగితే) కనిపిస్తే, వెంటనే దాని పర్మిషన్స్‌ను కట్ (Don’t allow) చేయండి.

అన్‌ఇన్‌స్టాల్ చేయండి: గూగుల్ ప్లే స్టోర్ (Play Store) నుంచి కాకుండా బయట వెబ్‌సైట్ల నుంచి డౌన్‌లోడ్ చేసిన థర్డ్-పార్టీ (APK) యాప్స్ ఉంటే వెంటనే డిలీట్ చేయండి. ఎక్కువగా ఇలాంటి యాప్స్ ద్వారానే హ్యాకర్లు స్పై చేస్తుంటారు.

సాఫ్ట్‌వేర్ అప్‌డేట్: మీ మొబైల్ ఆపరేటింగ్ సిస్టమ్, సెక్యూరిటీ ప్యాచ్‌లను ఎప్పటికప్పుడు అప్‌డేట్ చేసుకోండి.

మీ స్మార్ట్‌ఫోన్ ప్రైవసీ మీ చేతుల్లోనే ఉంది. ఇకపై మీ ఫోన్ స్క్రీన్ మీద గ్రీన్ డాట్ కనిపిస్తే దాన్ని నిర్లక్ష్యం చేయకండి. వెంటనే ఏ యాప్ వాడుతుందో చెక్ చేసుకుని జాగ్రత్త పడండి.

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com