దసరా పండుగ ఎప్పుడు? అక్టోబర్ 20నా లేక 21నా? క్లారిటీ ఇచ్చిన పండితులు!

భారతీయులు అత్యంత భక్తిశ్రద్ధలతో, ఘనంగా జరుపుకునే అతిపెద్ద పండుగలలో ‘దసరా’ ఒకటి. చెడుపై మంచి సాధించిన విజయానికి ప్రతీకగా ఈ పండుగను జరుపుకుంటారు. శ్రీరాముడు రావణుడిని సంహరించిన రోజుగా, అలాగే తొమ్మిది రోజుల పాటు సాగే శరన్నవరాత్రి ఉత్సవాలు ముగిసే పర్వదినంగా విజయదశమికి ఎంతో ప్రాముఖ్యత ఉంది.

సాధారణంగా ప్రతి సంవత్సరం ఆశ్వయుజ మాసం శుక్ల పక్షం పదవ రోజున ఈ పండుగను దేశవ్యాప్తంగా జరుపుకుంటారు. అయితే, ప్రతీ ఏడాది లాగానే ఈసారి కూడా దసరా ఏ రోజు జరుపుకోవాలనే దానిపై జనాల్లో చిన్న కన్ఫ్యూజన్ మొదలైంది. ముఖ్యంగా ఈ ఏడాది పండుగ అక్టోబర్ 20వ తేదీనా? లేక 21వ తేదీనా? అని చాలామంది తికమక పడుతున్నారు. మరి దీనిపై పండితులు ఏం చెబుతున్నారో, కచ్చితమైన పండుగ రోజు ఏంటో ఇప్పుడు చూద్దాం.

అక్టోబర్ 20వ తేదీనే పండుగ!
పండితులు చెబుతున్న దాని ప్రకారం.. 2026లో దసరా పండుగను అక్టోబర్ 20వ తేదీ (మంగళవారం) జరుపుకోవడమే సరైనది.

ఎందుకు అంటే? పండితుల వివరణ ఇదే..
దసరా పండుగ జరుపుకోవాలంటే కేవలం దశమి తిథి ఉంటే సరిపోదు. ఆ తిథితో పాటు శ్రవణ నక్షత్రం, ప్రదోష కాలం, విజయ ముహూర్తం.. ఇవన్నీ కలిసి రావాలి. అక్టోబర్ 21 (బుధవారం) రోజున సూర్యోదయ సమయంలో ఉదయ తిథిగా దశమి ఉన్నప్పటికీ.. దసరాకు అత్యంత కీలకమైన శ్రవణ నక్షత్రం, ప్రదోషకాలం ఆ రోజు కలిసి రావడం లేదు.

అదే అక్టోబర్ 20 (మంగళవారం) రోజున దశమి తిథి ప్రారంభం కావడమే కాకుండా, శ్రవణ నక్షత్రం, ప్రదోష కాలం, విజయ ముహూర్తం అన్నీ కచ్చితంగా ఒకేరోజు కుదురుతున్నాయి. అందుకే శాస్త్రాల ప్రకారం పండుగ జరుపుకోవడానికి అక్టోబర్ 20వ తేదీయే సరైన రోజు అని పండితులు స్పష్టం చేస్తున్నారు.

రావణ దహనం ఎప్పుడు?
ఈ ముహూర్తాల ప్రకారం, అక్టోబర్ 20వ తేదీ మధ్యాహ్నం 1:59 గంటలకు విజయ ముహూర్తంలో దసరా పూజలు చేసుకోవచ్చు. ఆ తర్వాత సాయంత్రం ప్రదోష కాలంలో ‘రావణ దహనం’ కార్యక్రమాలు నిర్వహించుకోవడానికి అత్యంత అనుకూలమైన సమయం అని పండితులు సూచిస్తున్నారు.

కాబట్టి, ఇక ఎలాంటి కన్ఫ్యూజన్ లేకుండా.. అక్టోబర్ 20వ తేదీనే మీ కుటుంబ సభ్యులతో కలిసి సంతోషంగా దసరా పండుగను జరుపుకోండి! అందరికీ విజయదశమి శుభాకాంక్షలు

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com