Varalakshmi Vratam: ఈ ఏడాది వరలక్ష్మీ వ్రతం ఆగస్టు 21నా? 28నా? 5 శుక్రవారాలు రావడంతో కన్ఫ్యూజ్ అవుతున్నారా.. ఇదిగో క్లారిటీ!
శ్రావణ మాసం వచ్చేస్తోంది.. పండగల సందడి మొదలైపోతోంది. ముఖ్యంగా మన తెలుగు ఇళ్లలో మహిళలు అత్యంత భక్తి శ్రద్ధలతో ఎదురుచూసే పండుగ ‘వరలక్ష్మీ వ్రతం’. అయితే, ఈ ఏడాది (2026) శ్రావణంలో ఒక చిన్న కన్ఫ్యూజన్ నెలకొంది.
అదేంటంటే.. ఈ నెలలో ఏకంగా 5 శుక్రవారాలు వస్తున్నాయి! మరి వ్రతం ఏ శుక్రవారం చేయాలి? ఆగస్టు 21వ తేదీన చేయాలా? లేక 28నా? అనే సందేహం చాలామందిలో ఉంది. మీకూ ఇదే డౌట్ ఉంటే.. పండితులు, శాస్త్రాలు ఏం చెబుతున్నాయో ఒకసారి చూసేయండి.
అసలు కన్ఫ్యూజన్ ఎందుకు వచ్చిందంటే..
సాధారణంగా వరలక్ష్మీ వ్రతాన్ని శ్రావణ పౌర్ణమికి ముందు వచ్చే శుక్రవారం రోజున చేసుకోవడం మన ఆనవాయితీ. స్కాంద పురాణం కూడా ఇదే చెబుతోంది. కానీ, ఈ ఏడాది అసలు చిక్కంతా ఎక్కడొచ్చిందంటే.. పౌర్ణమి తిథి ఏకంగా శుక్రవారం రోజే (ఆగస్టు 28న) వచ్చింది. దీంతో రెండో శుక్రవారం చేయాలా? లేక పౌర్ణమి రోజున వచ్చే శుక్రవారం చేయాలా? అన్న ప్రశ్న తలెత్తింది.
ధర్మశాస్త్రం ఏం చెబుతోంది? ఏ రోజున వ్రతం చేయాలి?
ధర్మశాస్త్రాల ప్రకారం.. పౌర్ణమి తిథి శుక్రవారాన్ని తాకినప్పుడు (దీనినే పండితులు ‘నోపాంతే భార్గవాదినే’ అంటారు) ఆ పౌర్ణమితో కూడిన శుక్రవారం రోజున కూడా వ్రతాన్ని ఆచరించవచ్చు. కాబట్టి మీ పూజా విధానాన్ని బట్టి పండితులు రెండు తేదీలను సూచిస్తున్నారు:
ఉదయం పూట పూజ చేసేవారు (ఆగస్టు 28): మీరు ఉదయాన్నే కలశం పెట్టుకుని వ్రతం చేసుకునే అలవాటు ఉన్నవారైతే.. మీరు ఆగస్టు 28న నిర్భయంగా వరలక్ష్మీ వ్రతం చేసుకోవచ్చు. పంచాంగకర్తలు కూడా ఉదయం పూజకు ఈ రోజునే సూచిస్తున్నారు.
సాయంత్రం పూజ చేసేవారు (ఆగస్టు 21): శృంగేరి శారదా పీఠం లాంటి కొన్ని సంప్రదాయాల్లో వరలక్ష్మీ వ్రత పూజను సాయంత్రం వేళలో చేస్తుంటారు. ఆగస్టు 28 సాయంత్రానికి పౌర్ణమి తిథి ఉండదు కాబట్టి.. సాయంత్రం పూజ చేసేవారు ఆగస్టు 21నే వ్రతం చేసుకోవడం శ్రేయస్కరం అని పండితులు చెబుతున్నారు.
చివరిగా ఒక మాట..
వరలక్ష్మీ వ్రతం తేదీల గురించి ఎక్కువగా ఆలోచించి కంగారు పడకండి. వ్రతం ఏ రోజు చేస్తున్నాం అన్నదాని కంటే.. ఎంత భక్తితో, పవిత్రంగా చేస్తున్నాం అన్నదే ముఖ్యం. నిజానికి శ్రావణమాసంలో వచ్చే ప్రతి శుక్రవారమూ ఆ మహాలక్ష్మికి ఇష్టమైనదే!
మీ వీలును బట్టి, మీ ఇంటి ఆనవాయితీని బట్టి ఆగస్టు 21 లేదా 28.. ఏ రోజునైనా నిర్మలమైన మనసుతో ఆ తల్లికి తోరపూజ చేసి, ముత్తైదువులకు వాయనాలు ఇవ్వండి. ఆ వరలక్ష్మీ దేవి ఆశీస్సులు, సిరిసంపదలు, ఆయురారోగ్యాలు మీ కుటుంబానికి తప్పకుండా దక్కుతాయి.
(మీ బంధుమిత్రులకు కూడా ఈ కన్ఫ్యూజన్ ఉంటే.. వెంటనే ఈ ఆర్టికల్ను వారికి షేర్ చేసి క్లారిటీ ఇవ్వండి!)
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.
Source: chaipakodi.com