రోజు తాగే కూల్‌డ్రింక్స్ పక్కనపెట్టి.. ఇంట్లోనే ఈ ‘పానీయం’ తాగండి.. మెదడుకు సూపర్ పవర్!
శరీరం త్వరగా అలసినప్పుడు మరియు వేడిని తగ్గించి శరీరానికి చల్లదనాన్ని ఇస్తూ, మెదడును చురుగ్గా ఉంచే ఒక అద్భుతమైన పానీయం ‘బాదం షర్బత్’. ఇది కేవలం దప్పికను తీర్చే పానీయం మాత్రమే కాదు, ఎన్నో పోషకాలు ఉన్నాయి!
ఈ బాదం షర్బత్ తయారీ విధానం, దాని వల్ల కలిగే అద్భుత ఆరోగ్య ప్రయోజనాలు ఇప్పుడు వివరంగా తెలుసుకుందాం.
కావలసిన పదార్థాలు
బాదం పప్పులు – అర కిలో
చక్కెర – అర కిలో
నీళ్లు – ఒక లీటర్
యాలకుల పొడి,
కుంకుమ పువ్వు – రుచి, వాసన మరియు మంచి రంగు కోసం
తయారీ విధానం
ముందుగా బాదం పప్పులను సుమారు 5 నుంచి 6 గంటల పాటు నీళ్లలో నానబెట్టాలి. ఇలా చేయడం వల్ల వాటి పొట్టు సులభంగా ఊడివస్తుంది.
పొట్టు తీసిన బాదం పప్పులను మిక్సీలో వేసి మెత్తటి పేస్ట్‌లా రుబ్బుకోవాలి.
స్టవ్ మీద ఒక గిన్నె పెట్టి అందులో నీళ్లు, చక్కెర వేసి మరిగించాలి. చక్కెర పూర్తిగా కరిగి పాకంలా మారుతున్న సమయంలో, ముందుగా రుబ్బి పెట్టుకున్న బాదం పేస్ట్‌ను అందులో కలపాలి.
దీనిని చిన్న మంట మీద ఆపకుండా కలుపుతూ ఉడికించాలి. మిశ్రమం కాస్త దగ్గర పడుతున్నప్పుడు యాలకుల పొడి, కుంకుమ పువ్వు వేసి కలపాలి.
ఇది చిక్కటి ద్రవంలా (సిరప్ లాగా) మారిన తర్వాత స్టవ్ ఆపి చల్లార్చుకోవాలి.
పూర్తిగా చల్లారిన తర్వాత ఒక గాజు సీసాలో పోసి ఫ్రిడ్జ్‌లో భద్రపరుచుకుంటే, ఇది దాదాపు నెల రోజుల పాటు తాజాగా ఉంటుంది.
ఎలా తాగాలి?
మట్టి కుండలో చల్లబరిచిన నీళ్లలో గానీ లేదా పాలలో గానీ రెండు చెంచాల ఈ బాదం మిశ్రమాన్ని కలుపుకొని తాగొచ్చు.
పైన కొన్ని చిన్న చిన్న బాదం పలుకులు చల్లుకుంటే, తాగేటప్పుడు అవి పంటికి తగులుతూ చాలా కరకరలాడుతూ రుచిగా ఉంటుంది.
నిద్రలేమి సమస్య ఉన్నవారు రాత్రి పడుకునే ముందు గోరువెచ్చని పాలలో కలుపుకొని తాగితే హాయిగా నిద్ర పడుతుంది.
ఆరోగ్య ప్రయోజనాలు
తక్షణ శక్తి: వేసవిలో చెమట రూపంలో బయటకు పోయే లవణాలను ఇది భర్తీ చేస్తుంది. నీరసాన్ని తగ్గించి, రోజంతా ఉత్సాహంగా ఉండేలా చేస్తుంది.
మెదడు చురుకుదనం: బాదంలో ఉండే విటమిన్-ఇ, మెగ్నీషియం, ఒమేగా-3 ఫ్యాటీ యాసిడ్స్ మెదడు పనితీరును (Cognitive function) మెరుగుపరుస్తాయి. విద్యార్థుల్లో ఏకాగ్రత, జ్ఞాపకశక్తి పెరుగుతుంది.
చర్మ కాంతి: బాదం, కుంకుమ పువ్వుల కలయిక వల్ల చర్మం కాంతివంతంగా (రేడియంట్‌గా) మారుతుంది.
శరీరానికి చల్లదనం: ఇది శరీర ఉష్ణోగ్రతను అదుపులో ఉంచుతుంది (Cooling effect). పిత్త దోషాన్ని తగ్గించి, కడుపులో మంట, ఎండల వల్ల చర్మంపై వచ్చే దద్దుర్లు రాకుండా కాపాడుతుంది.
జీర్ణ వ్యవస్థ మెరుగు: యాలకుల పొడి జీర్ణక్రియను మెరుగుపరుస్తుంది. అసిడిటీ, మలబద్ధకం లాంటి సమస్యలను నివారిస్తుంది.
రక్తహీనతకు చెక్: కుంకుమ పువ్వు, బాదం కలయిక రక్తాన్ని వృద్ధి చేస్తుంది, ఎనీమియా (రక్తహీనత) సమస్యను దూరం చేస్తుంది.
బయట దొరికే కృత్రిమ రంగులు, రసాయనాలు కలిపిన కూల్ డ్రింక్స్ కంటే, ఇంట్లోనే శుభ్రంగా మరయు సులభంగా తయారు చేసుకునే ఈ బాదం షర్బత్ పిల్లలకు, వృద్ధులకు ఒక మంచి హెల్త్ టానిక్‌లా పనిచేస్తుంది. మధుమేహం (షుగర్ వ్యాధి) ఉన్నవారు చక్కెర బదులు బెల్లం లేదా తాటి బెల్లం (Palm jaggery) వేసుకోవచ్చు.
మా ఇంట్లో పిల్లలు పాలు తాగడానికి చాలా పేచీలు పెట్టేవారు. కానీ ఈ బాదం షర్బత్ కలిపి ఇచ్చినప్పటి నుంచి వాళ్ళే అడిగి మరీ తాగుతున్నారు. కడుపులో చల్లగా ఉండటమే కాకుండా, వాళ్లలో మంచి చురుకుదనం కూడా కనిపిస్తోంది. బయట దొరికే డ్రింక్స్ పిల్లలకి ఇచ్చి ఆరోగ్యం పాడుచేసే బదులు, మీరు కూడా నాలాగా ఇంట్లోనే ఇలా స్వచ్ఛంగా చేసి చూడండి. కచ్చితంగా మీకూ నచ్చుతుంది!
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.
Source: chaipakodi.com