Munugaku Pappu Recipe:అన్ని రోగాలకు దివ్యఔషదం.. “మునగాకు పప్పు”.. ఎన్నో రకాల ఔషధ గుణాలు..

Munugaku Pappu Recipe:అన్ని రోగాలకు దివ్యఔషదం.. “మునగాకు పప్పు”.. ఎన్నో రకాల ఔషధ గుణాలు.. మునగాకు పప్పు అనేది సంప్రదాయమైన, అత్యంత ఆరోగ్యకరమైన భారతీయ వంటకం. మునగాకును సూపర్ ఫుడ్ అని పిలుస్తారు, ఎందుకంటే ఇందులో విటమిన్లు, ఖనిజాలు, యాంటీఆక్సిడెంట్లు సమృద్ధిగా ఉంటాయి.

పప్పుతో కలిపి వండినప్పుడు ఇది రుచికరంగా ఉండటమే కాకుండా, పోషకాలతో నిండిన సమతులాహారంగా మారుతుంది. ఆషాఢ మాసంలో మునగాకు పప్పు తినడం కేవలం రుచి కోసం మాత్రమే కాదు, మన పూర్వీకులు ఆలోచనాత్మకంగా రూపొందించిన ఆరోగ్య రహస్యం. ఈ సంప్రదాయం వెనుక వాతావరణ మార్పులు మరియు శరీర ఆరోగ్యం మధ్య సంబంధం ఉంది.

ఆషాఢ మాసంలో వాతావరణ మార్పుల వల్ల జలుబు, జ్వరం, దగ్గు వంటి సాధారణ ఇన్ఫెక్షన్లు లేదా అంటువ్యాధులు వచ్చే అవకాశం ఎక్కువగా ఉంటుంది. మునగాకులో విటమిన్ సి, విటమిన్ ఏ, విటమిన్ ఈ, ఇతర యాంటీఆక్సిడెంట్లు ఉండటం వల్ల రోగనిరోధక శక్తి పెరుగుతుంది. మునగాకు పప్పును ఆహారంలో చేర్చుకోవడం శరీరానికి వ్యాధులతో పోరాడే శక్తిని అందిస్తుంది.

వర్షాకాలంలో, ముఖ్యంగా ఆషాఢంలో, జీర్ణశక్తి కొంత మందగిస్తుందని నమ్ముతారు. మునగాకులో ప్రోటీన్లు, కాల్షియం, ఐరన్, పొటాషియం, మెగ్నీషియం, బి-కాంప్లెక్స్ విటమిన్లు వంటి అనేక పోషకాలు ఉంటాయి, ఇవి శరీరానికి అవసరమైన శక్తిని అందిస్తాయి. పప్పుతో కలిపి తినడం వల్ల ప్రోటీన్ శాతం మరింత పెరిగి, ఇది సమతుల ఆహారంగా మారుతుంది. ఇది వర్షాకాలంలో జీర్ణ సమస్యలను తగ్గించడంలో సహాయపడుతుంది. మునగాకు శరీరంలో కొద్దిగా వేడిని పెంచుతుందని చెబుతారు.

మునగాకు పప్పు తయారీకి కావాల్సిన పదార్థాలు:
– మునగాకులు: 2 కప్పులు
– కందిపప్పు: 1 కప్పు
– టమాటో: 1
– పచ్చిమిర్చి: 5
– చింతపండు: 30 గ్రాములు
– వెల్లుల్లి రెబ్బలు: 5-6
– పసుపు : అర టీస్పూన్
– ఉప్పు: 1½ టీస్పూన్
– ఎండుమిర్చి: 2
– కరివేపాకు: అర కప్పు
– ఆవాలు: అర టీస్పూన్
– జీలకర్ర: అర టీస్పూన్
– నూనె: 2 టేబుల్ స్పూన్లు

తయారీ విధానం:
1. కుక్కర్‌లో శుభ్రంగా కడిగిన 1 కప్పు కందిపప్పు, 2 కప్పుల మునగాకులు, 5 పచ్చిమిర్చి చీలికలు, 1 టమాటో ముక్కలు, నిమ్మకాయ సైజు చింతపండు, అర టీస్పూన్ పసుపు, 3 కప్పుల నీళ్లు పోసి, మూత పెట్టి 4-5 విజిల్స్ వచ్చే వరకు ఉడికించాలి.
2. మూత తీసి, ఉడికిన పప్పును మెత్తగా మెదపాలి. రుచికి తగినట్టు ఉప్పు, కొద్దిగా కారం వేసి కలపాలి.
3. తాళింపు కోసం పాన్‌లో 2 టేబుల్ స్పూన్ల నూనె వేసి వేడి చేయాలి. నూనె వేడయ్యాక, అర టీస్పూన్ ఆవాలు, అర టీస్పూన్ జీలకర్ర, 3 ఎండుమిర్చి ముక్కలు వేసి వేయించాలి. తర్వాత దంచిన వెల్లుల్లి రెబ్బలు వేసి 1 నిమిషం వేగనివ్వాలి. చివరగా కరివేపాకు వేసి వేయించాలి.
4. ఈ తాళింపులో ఉడికిన మునగాకు పప్పు వేసి కలపాలి. 5 నిమిషాలు సిమ్‌లో ఉడకనిచ్చి స్టవ్ ఆఫ్ చేయాలి.

అంతే! రుచికరమైన, ఆరోగ్యకరమైన మునగాకు పప్పు సిద్ధం.