Home Remedies: ఇంట్లో బొద్దింకలతో ఇబ్బందిగా ఉందా..? ఈ టిప్స్ పాటించి చూడండి..!

Home Remedies: ఇంట్లో బొద్దింకలతో ఇబ్బందిగా ఉందా..? ఈ టిప్స్ పాటించి చూడండి.. గతంలో పెద్ద బొద్దింకలు ఎక్కువగా కనిపించేవి. కానీ ఇప్పుడు సింకులు, వంటశాలల్లో చిన్న బొద్దింకలు అధికంగా కనిపిస్తున్నాయి. ఇవి ఒకేసారి పెద్ద సంఖ్యలో పిల్లలను ఉత్పత్తి చేసి తమ సంతతిని విస్తరిస్తాయి.

దీంతో అవి అన్ని చోట్ల తమ నివాసాన్ని ఏర్పాటు చేసుకుంటాయి. ముఖ్యంగా ఆహార పదార్థాలపై తిరుగుతూ వాటి వ్యర్థాలు ఆహారంలో కలిసిపోతాయి. అందుకే ఇంటిని బొద్దింకలు లేకుండా శుభ్రంగా ఉంచుకోవడం చాలా ముఖ్యం. లేకపోతే అనేక ఆరోగ్య సమస్యలు వచ్చే అవకాశం ఉంది. బొద్దింకల వల్ల తీవ్రమైన ఆరోగ్య సమస్యలు తలెత్తుతాయని వైద్యులు హెచ్చరిస్తున్నారు.

తీవ్రమైన ఇన్ఫెక్షన్లు
బొద్దింకలు సింకులు, బాత్రూంలలో తిరుగుతూ బ్యాక్టీరియా, వ్యాధికారక జీవులను తీసుకొస్తాయి. తర్వాత అవి ఆహార గిన్నెలు, వంటసామానులపై తిరుగుతాయి. దీనివల్ల కలరా, టైఫాయిడ్, E. కోలి వంటి ఇన్ఫెక్షన్లు సంక్రమించే అవకాశం ఉంది.

రాత్రి సమయంలోనే కదలిక
బొద్దింకలు రాత్రిపూట తిరిగే జీవులు. చీకటిలో తిరగడం, నివసించడం, ఆహారం తినడం వీటికి ఇష్టం. పగటిపూట బొద్దింకలు కనిపించడం చాలా అరుదు. కానీ రాత్రిళ్లు వంటశాలలో సంచరిస్తూ ఉంటాయి. ఇరుకైన చోట్ల, చల్లని ప్రదేశాల్లో, గోడల పగుళ్లలో, చాపల కింద దాక్కుంటాయి. వీటిని తరిమేందుకు కొన్ని సులభమైన చిట్కాలను అనుసరించవచ్చు.

బేకింగ్ సోడా వాడకం
బొద్దింకలకు చక్కెర, పిండి పదార్థాలు ఎంతో ఇష్టం. కాబట్టి బేకింగ్ సోడా, చక్కెర కలిపి బొద్దింకలు తిరిగే ఇంటి మూలల్లో చల్లండి. చక్కెర ఆకర్షణతో వచ్చిన బొద్దింకలు బేకింగ్ సోడాను కూడా తింటాయి, దీనివల్ల అవి మరణిస్తాయి. బేకింగ్ సోడా వాటి శరీరంపై ప్రతికూల ప్రభావం చూపిస్తుంది.

స్ప్రే తయారీ
వంటశాలలో బొద్దింకల సమస్యను తగ్గించడానికి ఇంట్లోనే స్ప్రే తయారు చేయవచ్చు. వెల్లుల్లి, ఉల్లిపాయ రసంలో మిరియాల పొడి కలిపి నీటితో స్ప్రే రూపంలో తయారు చేయండి. ఈ స్ప్రేను వంటశాల మూలల్లో, వంట పాత్రలు, స్టవ్, ప్లాట్‌ఫాం మీద చల్లండి. వెల్లుల్లి, ఉల్లిపాయలలోని సల్ఫర్ సమ్మేళనాలు, మిరియాలలోని క్యాప్సైసిన్ బొద్దింకలకు చికాకు కలిగిస్తాయి. ఈ వాసనకు తట్టుకోలేక అవి వంటశాల నుండి పారిపోతాయి.

బోరిక్ యాసిడ్ ఉపయోగం
బోరిక్ యాసిడ్ పౌడర్ లేదా జెల్ రూపంలో మార్కెట్లో లభిస్తుంది. ఇది బొద్దింకల సమస్యను నియంత్రించడంలో సహాయపడుతుంది. బొద్దింకలు తిరిగే చోట ఈ పౌడర్ లేదా జెల్‌ను చల్లండి. బొద్దింకలు దానిపై నడిచినప్పుడు అది వాటి శరీరానికి అంటుకుంటుంది. ఇది వాటి నాడీ వ్యవస్థపై దాడి చేసి, విషంగా మారి వాటి జీవక్రియలను ఆటంకపరిచి మరణానికి దారితీస్తుంది.

బిర్యానీ ఆకులు
బిర్యానీ ఆకులు కూడా బొద్దింకలను తరిమేందుకు ఉపయోగపడతాయి. వాటిని కాల్చినప్పుడు వచ్చే బలమైన వాసన బొద్దింకలకు నచ్చదు. వంటశాలలో ఆకులను కాల్చడం లేదా మెత్తగా పొడి చేసి బొద్దింకలు తిరిగే చోట చల్లడం చేయండి. ఇలా కొనసాగిస్తే బొద్దింకలు ఆ ప్రాంతాన్ని వదిలి వెళ్లిపోతాయి.

వేప నూనె
వేప నూనెలో బొద్దింకలను తరిమే గుణాలు ఉన్నాయి. మార్కెట్లో లభించే వేప నూనెను కొని, సింకుల కింద, గిన్నెల చుట్టూ, బొద్దింకలు దాక్కునే చోట్ల చల్లండి. వేప నూనెలోని ఆజాడిరెక్టిన్ అనే సమ్మేళనం బొద్దింకల హార్మోన్లను అస్తవ్యస్తం చేసి, గుడ్లు పెట్టే సామర్థ్యాన్ని తగ్గిస్తుంది. కొన్ని రోజుల్లో బొద్దింకల సంఖ్య గణనీయంగా తగ్గుతుంది.