Sweet Corn Kebab: పిల్లలు స్నాక్స్ అడిగితే స్వీట్ కార్న్ తో వేడి వేడిగా ఇలా “కబాబ్” చేసి పెట్టండి

Sweet Corn Kebab: పిల్లలు స్నాక్స్ అడిగితే స్వీట్ కార్న్ తో వేడి వేడిగా ఇలా “కబాబ్” చేసి పెట్టండి.. స్వీట్ కార్న్ మార్కెట్లో దొరికితే కొని ఇంటికి తెచ్చుకోండి. దీనితో రుచికరమైన కబాబులు తయారు చేయవచ్చు.

ముఖ్యంగా వర్షాకాలంలో వేడి వేడి స్వీట్ కార్న్ కబాబులు తింటూ ఉంటే ఆ రుచి అద్భుతంగా ఉంటుంది. ఈ కబాబుల్లో ఆరోగ్యానికి మేలు చేసే ఎన్నో పదార్థాలు ఉంటాయి, కాబట్టి పొట్ట నిండిన భావన కూడా కలుగుతుంది. అయితే ఇంకెందుకు ఆలస్యం, స్వీట్ కార్న్ కబాబ్ ఎలా తయారు చేయాలో తెలుసుకోండి.

స్వీట్ కార్న్ కబాబ్ రెసిపీకి కావాల్సిన పదార్థాలు
స్వీట్ కార్న్ – 2 పొత్తులు
బంగాళదుంపలు – 4
నూనె – డీప్ ఫ్రైకి సరిపడా
కొత్తిమీర తరుగు – 2 టీస్పూన్లు
ఉప్పు – రుచికి తగినంత
కసూరి మేతి – 1 టీస్పూను
మసాలా పొడి – 1 టీస్పూను
చాట్ మసాలా – 1 టీస్పూను
అల్లం వెల్లుల్లి పేస్ట్ – అర టీస్పూను
పచ్చిమిర్చి పేస్ట్ – అర టీస్పూను
శెనగపిండి – 2 టేబుల్ స్పూన్లు
క్యాప్సికం తరుగు – 1 టీస్పూను
క్యారెట్ తరుగు – 1 టీస్పూను

స్వీట్ కార్న్ కబాబ్ తయారీ విధానం
స్వీట్ కార్న్ తెచ్చిన తర్వాత గింజలను ఒలిచి ఉంచండి. వాటిని ఆవిరిపై ఉడికించండి.తర్వాత మిక్సీలో వేసి మెత్తగా రుబ్బండి. కొన్ని స్వీట్ కార్న్ గింజలను రుబ్బకుండా పక్కన పెట్టండి.రుబ్బిన స్వీట్ కార్న్ మిశ్రమంలో ఉడికించిన గింజలను కూడా కలపండి.

ఇప్పుడు ఈ మిశ్రమంలో ఉడికించిన బంగాళదుంపలను చేతితో మెత్తగా మెదిపి కలపండి.రుచికి తగినంత ఉప్పు, కొత్తిమీర తరుగు, కసూరి మేతి వేసి బాగా కలపండి.
అలాగే మసాలా పొడి, చాట్ మసాలా, పచ్చిమిర్చి పేస్ట్, అల్లం వెల్లుల్లి పేస్ట్ కూడా జోడించి కలపండి.మెత్తగా తరిగిన క్యారెట్, క్యాప్సికం తరుగు, శెనగపిండిని కూడా వేసి బాగా కలపండి.

అవసరమైతే కొద్దిగా నీరు జోడించండి. మిశ్రమం జారుడుగా కాకుండా మందంగా ఉండేలా చూసుకోండి. ఈ మిశ్రమాన్ని 10 నిమిషాల పాటు సాధారణ ఫ్రిజ్‌లో ఉంచండి.తర్వాత మిశ్రమాన్ని బయటకు తీసి, కబాబ్ ఆకారంలో వత్తుకుని, వేడి నూనెలో డీప్ ఫ్రై చేయండి.

వేగిన కబాబులను టిష్యూ పేపర్‌పై వేసి, అదనపు నూనెను పీల్చేలా ఒకసారి ఒత్తండి. ఈ కబాబులను పుదీనా చట్నీతో సర్వ్ చేస్తే రుచి అద్భుతంగా ఉంటుంది. ఈ పద్ధతిలో ఒకసారి చేసి చూడండి, మీకు తప్పకుండా నచ్చుతుంది!