Onion Samosa Recipe: “ఉల్లి సమోసా” రెసిపీ.. క్రిస్పీగా, టేస్టీగా ఇంట్లో కూడా ఈజీగా చేసేయొచ్చు
Onion Samosa Recipe: “ఉల్లి సమోసా” రెసిపీ.. క్రిస్పీగా, టేస్టీగా ఇంట్లో కూడా ఈజీగా చేసేయొచ్చు.. సమోసాలు ఎంత రుచికరంగా ఉంటాయో అందరికీ తెలిసిందే. వివిధ రుచులలో సమోసాలు లభిస్తాయి, మరియు వీటిని ఇంట్లో కూడా సులభంగా, రుచిగా తయారు చేసుకోవచ్చు. అందులో భాగంగా, సులభంగా తయారు చేయగలిగే, రుచికరమైన ఉల్లిపాయ సమోసాల తయారీ విధానం మరియు దీనికి కావలసిన పదార్థాల గురించి ఇప్పుడు తెలుసుకుందాం.
ఉల్లిపాయ సమోసా తయారీకి కావలసిన పదార్థాలు:
మైదా పిండి – 2 కప్పులు
వాము – 1 టీ స్పూన్
తరిగిన ఉల్లిపాయ ముక్కలు – 1 కప్పు
తరిగిన పచ్చిమిర్చి – 1 టీ స్పూన్
ధనియాల పొడి – 1 టీ స్పూన్
జీలకర్ర పొడి – 1 టీ స్పూన్
ఉప్పు – తగినంత
కారం – తగినంత
నూనె – డీప్ ఫ్రైకి సరిపడా
ఉల్లిపాయ సమోసా తయారీ విధానం:
ముందుగా, మైదా పిండిలో 1 టీ స్పూన్ నూనె, వాము వేసి మెత్తగా కలపాలి. ఈ పిండిని మూతపెట్టి 10 నిమిషాల పాటు అలాగే ఉంచాలి.తర్వాత, ఈ పిండిని మధ్యస్థ పరిమాణంలో ముద్దలుగా చేసి, చపాతీలా చేయాలి.
ఈ చపాతీలను పెనం మీద ఉంచి, 10 సెకన్ల వ్యవధిలో రెండు వైపులా కొద్దిగా కాల్చాలి.కాల్చిన చపాతీలను దీర్ఘ చతురస్రాకారంలో కావలసిన పరిమాణంలో కట్ చేసి పక్కన పెట్టుకోవాలి.
ఒక గిన్నెలో నూనె తప్ప, మిగిలిన అన్ని పదార్థాలను (ఉల్లిపాయలు, పచ్చిమిర్చి, ధనియాల పొడి, జీలకర్ర పొడి, ఉప్పు, కారం) వేసి బాగా కలపాలి.మరో గిన్నెలో కొద్దిగా మైదా పిండి తీసుకుని, నీళ్లు పోసి పేస్ట్లా తయారు చేయాలి.
కట్ చేసి పెట్టుకున్న చపాతీ ముక్కలను సమోసా ఆకారంలో మడిచి, అందులో కలిపిన ఉల్లిపాయ మిశ్రమాన్ని నింపాలి. అంచులకు మైదా పేస్ట్ రాసి సమోసాలను గట్టిగా మూసివేయాలి.
ఒక కళాయిలో డీప్ ఫ్రైకి సరిపడా నూనె పోసి, కాగిన తర్వాత సమోసాలను వేసి, బంగారు రంగు వచ్చే వరకు వేయించాలి.ఇలా తయారు చేసిన ఉల్లిపాయ సమోసాలు క్రంచీగా, రుచికరంగా ఉంటాయి. వీటిని పుదీనా చట్నీ లేదా టమాటా సాస్తో సర్వ్ చేస్తే మరింత రుచిగా ఉంటాయి.