బెండకాయతో ఇలా చేస్తే చిప్స్, కుర్కురేలు అస్సలు కొనరు.. ప్లేట్ ఖాళీ అవ్వాల్సిందే!

బెండకాయ అనగానే చాలా మందికి ముందుగా గుర్తొచ్చేది జిగురు. ఆ జిగురు వల్లే ఇంట్లో పిల్లలు, పెద్దలు దీనిని తినడానికి అంతగా ఇష్టపడరు. సాధారణంగా ఇంట్లో చేసే బెండకాయ వేపుడు కాకుండా.. హోటల్ స్టైల్‌లో కరకరలాడే ‘బెండకాయ కుర్ కురే’ (Crispy Bhindi Kurkure) ఇంట్లోనే ఈజీగా చేసుకోవచ్చు.

ఉత్తర భారతదేశంలో పప్పు అన్నం (Dal Rice) కాంబినేషన్‌గా దీనిని ఎక్కువగా తింటారు. సాయంత్రం పూట స్నాక్స్‌లా తినేందుకు కూడా ఇది బెస్ట్ ఆప్షన్. చిప్స్ కంటే ఎంతో రుచిగా ఉండే ఈ క్రిస్పీ బెండకాయ కుర్ కురే ఎలా చేయాలో ఇప్పుడు చూద్దాం..

కావలసిన పదార్థాలు:
బెండకాయలు: 400 గ్రాములు
శనగపిండి: ముప్పావు కప్పు
బియ్యప్పిండి: 3 స్పూన్లు (ఇది క్రిస్పీనెస్ ఇస్తుంది)
అల్లం వెల్లుల్లి పేస్ట్: అర స్పూన్
కారం: అర స్పూన్
గరం మసాలా: అర స్పూన్

ధనియాల పొడి: అర స్పూన్
జీలకర్ర పొడి: ఒక స్పూన్
జీలకర్ర: పావు స్పూను
చాట్ మసాలా: అర స్పూన్ (చక్కటి పులుపు, రుచి కోసం)
ఉప్పు, నూనె: సరిపడా
నీళ్లు: కేవలం రెండు స్పూన్లు

తయారీ విధానం (Step-by-Step):
ముందుగా బెండకాయలను శుభ్రంగా కడిగి, తడి లేకుండా పూర్తిగా ఆరబెట్టాలి. రెండు చివరలు కట్ చేసి, నిలువుగా చీల్చాలి. లోపల ఉండే గింజలను తీసేసి, ప్రతి బెండకాయను పొడవుగా నాలుగు ముక్కలుగా (సుమారు రెండు అంగుళాల సైజులో) కట్ చేసుకోవాలి. గింజలు తీసేయడం వల్ల జిగురు అస్సలు ఉండదు.

ఒక మిక్సింగ్ బౌల్ తీసుకుని అందులో శెనగపిండి, బియ్యప్పిండి, జీలకర్ర, కారం, గరం మసాలా మరియు సరిపడా ఉప్పు వేసి బాగా కలుపుకోవాలి. ఇప్పుడు ఇందులో కట్ చేసి పెట్టుకున్న బెండకాయ ముక్కలు వేసి, పిండి అంతా ముక్కలకు పట్టేలా డ్రైగా ఒకసారి టాస్ చేయాలి.

ఆ తర్వాత అదే బౌల్‌లో అల్లం వెల్లుల్లి పేస్ట్, ధనియాల పొడి, జీలకర్ర పొడి, చాట్ మసాలా వేయాలి. మసాలాలన్నీ ముక్కలకు గట్టిగా అంటుకునేందుకు కేవలం ఒకట్రెండు స్పూన్ల నీళ్లు చిలకరించి బాగా కలపాలి. (ఎక్కువ నీళ్లు పోస్తే ముక్కలు మెత్తబడతాయి, జాగ్రత్త).

స్టవ్ మీద కడాయి పెట్టి వేయించడానికి సరిపడా నూనె పోసి బాగా వేడి చేయాలి. నూనె కాగాక, మంటను మీడియం ఫ్లేమ్‌లో ఉంచి, మసాలా పట్టిన బెండకాయ ముక్కలను విడివిడిగా నూనెలో వేయాలి.

ముక్కలు మంచి గోల్డెన్ బ్రౌన్ కలర్‌లోకి వచ్చి, కరకరలాడే వరకు (సుమారు 2-3 నిమిషాలు) వేయించి ప్లేట్ లోకి తీసుకోవాలి.

స్పెషల్ టిప్: ముక్కలను నూనె నుండి తీసిన వెంటనే పైన కొద్దిగా చాట్ మసాలా చల్లుకుంటే థియేటర్లలో దొరికే పాప్‌కార్న్, చిప్స్ కంటే సూపర్ టేస్టీగా ఉంటాయి. ఇంకెందుకు ఆలస్యం, ఈ రోజే మీ ఇంట్లో ట్రై చేసి పిల్లలకి స్నాక్స్‌గా పెట్టేయండి!

గమనిక: ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com