Karthika Masam 2025:కార్తీక మాసమంతా ఈ రాశుల వారికి పట్టిందల్లా బంగారమే..

Karthika Masam 2025:కార్తీక మాసమంతా ఈ రాశుల వారికి పట్టిందల్లా బంగారమే.. హిందూ సంప్రదాయంలో కార్తీక మాసం అత్యంత పవిత్రమైనదిగా పరిగణించబడుతుంది. ఈ మాసం దేవతారాధన, ఆధ్యాత్మిక సాధనలకు అత్యంత శుభప్రదమైనదిగా భావిస్తారు, ముఖ్యంగా శివుడు, విష్ణుమూర్తికి ప్రీతికరమైన సమయంగా విశ్వసిస్తారు. ఈ మాసంలో పూజలు, నోములు, వ్రతాలు ఆచరించడం సాంప్రదాయం. ఉపవాసాలకు ప్రత్యేక ప్రాముఖ్యత ఉంది. ఈ సందర్భంలో, రాశుల వారీగా పాటించాల్సిన పరిహారాలు, నియమాలు ఏమిటో తెలుసుకుందాం.

సాధారణ నియమాలు:
కార్తీక మాసం శివుడు, విష్ణుమూర్తికి అత్యంత ప్రీతికరమైనది. ఈ మాసంలో సూర్యోదయానికి ముందు నిద్రలేచి పవిత్ర స్నానం చేయడం శుభప్రదం. ఉదయం తులసి కోట వద్ద దీపం వెలిగించడం, సాయంత్రం నక్షత్ర దర్శనం తర్వాత ఇంట్లో లేదా తులసి కోట వద్ద దీపం వెలిగించడం మంచిది. దీప దానం చేయడం కూడా అత్యంత శుభప్రదం.

సోమవారాల్లో శివుడికి అభిషేకం, శనివారాల్లో విష్ణు ఆరాధన, విష్ణు సహస్రనామ పారాయణం చేయడం పుణ్యప్రదం. ప్రతిరోజూ ఉపవాసం సాధ్యం కాకపోయినా, కార్తీక సోమవారాలు, కార్తీక ఏకాదశి, కార్తీక పౌర్ణమి వంటి పర్వదినాల్లో ఉపవాసం ఆచరించడం మంచిది. పేదలకు శక్తిమేరకు దానం చేయడం, కార్తీక పురాణం చదవడం కూడా శుభ ఫలితాలను ఇస్తుంది.

రాశుల వారీగా నియమాలు:
మేష రాశి:
ఈ రాశి వారు కార్తీక మాసంలో శివారాధన చేయడం, శివుడికి అభిషేకం చేయడం ఉత్తమం. రాగి పాత్రలో దీపం వెలిగించడం శుభ ఫలితాలను ఇస్తుంది.
వృషభ రాశి:
శివారాధనతో పాటు తులసి పూజ చేయడం ఈ రాశి వారికి శుభప్రదం. దేవాలయంలో నెయ్యి దీపం వెలిగించి, లలితా సహస్రనామం పఠించడం వల్ల అద్భుత ఫలితాలు కలుగుతాయి.
మిథున రాశి:
విష్ణుమూర్తిని ఆరాధించడం, భగవద్గీత లేదా విష్ణు సహస్రనామం పఠించడం ఈ రాశి వారికి శుభం. పేద విద్యార్థులకు పుస్తకాలు దానం చేయడం కూడా మంచిది.
కర్కాటక రాశి:
ఇంట్లో లేదా దేవాలయంలో శివలింగానికి పాలతో అభిషేకం చేయడం, ప్రతిరోజూ దీపారాధన చేయడం, ఓం నమః శివాయ మంత్రం జపించడం శుభప్రదం.
సింహ రాశి:
ప్రతిరోజూ సూర్య నమస్కారాలు చేయడం, ఆదిత్య హృదయం పారాయణం చేయడం, కుటుంబ సభ్యులతో కలిసి శివ పూజ చేయడం ఈ రాశి వారికి మంచిది.
కన్యా రాశి:
తులసి చెట్టుకు పూజ, ప్రదక్షిణలు చేయడం, కార్తీక దామోదరుడిని ఆరాధించడం శుభం. వీలైనంత మందికి అన్నదానం చేయడం పుణ్యప్రదం.
తులా రాశి:
లక్ష్మీదేవిని పూజించడం, ప్రతి శుక్రవారం అష్టలక్ష్మీ ఆరాధన చేయడం, పసుపు, కుంకుమ దానం చేయడం ఈ రాశి వారికి శుభప్రదం.
వృశ్చిక రాశి:
సుబ్రహ్మణ్య స్వామిని ఆరాధించడం, ప్రతిరోజూ దీపారాధన చేసి సుబ్రహ్మణ్య అష్టకం పఠించడం ఈ రాశి వారికి మంచిది.
ధనుస్సు రాశి:
గురువులు, పెద్దల ఆశీర్వాదం తీసుకోవడం, పురాణ గ్రంథాలు చదవడం, శ్రీ మహావిష్ణువును పూజించడం ఈ రాశి వారికి శుభ ఫలితాలను ఇస్తుంది.
మకర రాశి:
శనీశ్వరుడికి నల్ల నువ్వుల నూనెతో దీపం వెలిగించడం, కష్టపడే వారికి సాయం చేయడం, దుప్పట్లు దానం చేయడం శుభం. ప్రదోష సమయంలో శివారాధన కూడా మంచి ఫలితాలను ఇస్తుంది.

కుంభ రాశి ఈ మాసంలో కుంభ రాశి వారు శివాలయానికి వెళ్లి ప్రదక్షిణలు చేయడం చాలా శుభప్రదంగా ఉంటుంది. సాయంత్రం సమయంలో శివారాధన చేయడం, నల్ల నువ్వులు లేదా నువ్వుల నూనె దానం చేయడం మంచి ఫలితాలనిస్తుంది.

మీన రాశి పవిత్రమైన కార్తీక మాసంలో మీన రాశి వారు పుణ్య నదీ స్నానం చేయడం ఉత్తమం. పేదలకు, వృద్ధులకు పండ్లు లేదా ఆహారం దానం చేయడం శుభకరం. అలాగే, “ఓం నమో నారాయణాయ” మంత్రాన్ని జపించడం కూడా శుభ ఫలితాలనిస్తుంది. ఈ నియమాలను పాటించడం ద్వారా కార్తీక మాసంలో శివకేశవుల ఆశీస్సులతో శాంతి, శ్రేయస్సు మరియు శుభ ఫలితాలు పొందవచ్చని నమ్మకం.ఈ నియమాలు పాటించడం వల్ల కార్తీక మాసంలో ఆధ్యాత్మిక, ఆర్థిక, సామాజిక శ్రేయస్సు సాధించవచ్చు.

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.