కీళ్ల నొప్పులకు చెక్ పెట్టే గోముఖాసనం

కూర్చోగల ఏ ప్రదేశంలోనైనా సులభంగా సాధన చేయదగిన ఆసనాల్లో గోముఖాసనం ఒకటి. చూసేందుకు ఆవు ముఖం భంగిమలో ఉండే ఆసనం గనుక దీన్ని గోముఖాసనం అంటారు. రోజూ ఈ ఆసనం సాధన చేస్తే కీళ్ళనొప్పుల నివారణ, నియంత్రణ పూర్తిగా సాధ్యమవుతాయి.

సాధనా పద్దతి
ముందుగా కాళ్ళు సౌకర్యవంతంగా చాచి కూర్చోవాలి.
ఇప్పుడు నెమ్మదిగా ఎడమ కాలును చిత్రంలో మాదిరిగా మడిచి దానిపై కుడి కాలిని తీసుకురావాలి.
ఈ భంగిమలో అరికాళ్ళు వీలున్న మేరకు పైకి చూస్తూ ఉండాలి.
ఇప్పుడు కుడి చేతిని లేపి తలమీదుగా , ఎడమచేతిని వెనక్కితిప్పి కిందిగా వీపు మీదికి తెచ్చి చేతివేళ్ళతో బంధించాలి.
ఈ భంగిమలో తల ఎడమవైపు త్రిప్పుతూ శ్వాస తీసుకుని కుడివైపు తిరిగి శ్వాస వదలాలి.
తర్వాత కాళ్ళను మార్చి చేయాలి. ఇలా 4 లేక 5 సార్లు చేయాలి.

ప్రయోజనాలు
ఈ ఆసనం సాధన చేస్తే వెన్నుపూస, మెడ, భుజం నొప్పులు తగ్గుతాయి.
ఊపిరి తిత్తుల పనితీరును మెరుగుపరచి శ్వాస సంబంధిత సమస్యలు రాకుండా చేస్తుంది.
ఉదరభాగపు కండరాలు బలోపేతమవుతాయి.
హెర్నియా బాధితులకు ఈ ఆసనం ఉపశమనాన్నిస్తుంది.
శరీరంలోని గ్రంథులు చురుగ్గా పనిచేసి ఆరోగ్యం మెరుగుపడేలా చేస్తుంది.
మధుమేహం, అతిమూత్రం, ఇంద్రియ బలహీనత, రక్తపోటు వంటి సమస్యలు అదుపులో ఉంటాయి.

గమనిక: ప్రారంభంలో చేతులు అందకపోతే సాధ్యం కాకపోతే రుమాలును ఉపయోగించాలి. అయినా.. ఇబ్బందిగా ఉన్నవారు చేతులతో పాదాల బొటన వ్రేళ్ళను పట్టుకొని ముందుకు వంగి ఈ ఆసనాన్ని సాధన చేయవచ్చు.