రొటీన్కు భిన్నంగా ‘కర్ణాటక స్టైల్ వైట్ చిత్రాన్నం’.. ఉదయం హడావిడిలో నిమిషాల్లోనే రెడీ!
చిత్రాన్నం లేదా లెమన్ రైస్ అంటే ఇష్టపడని వారుండరు. ముఖ్యంగా మన రాయలసీమ చిత్రాన్నం రుచి గురించి ప్రత్యేకంగా చెప్పాల్సిన పనేలేదు.
కానీ, ఎప్పుడూ ఒకేలా కాకుండా కాస్త వెరైటీగా ట్రై చేయాలనుకుంటున్నారా? అయితే కొబ్బరి, సోయా ఆకులతో చేసే ‘కర్ణాటక స్టైల్ వైట్ చిత్రాన్నం’ మీకోసమే.
దీని రుచికి ఫిదా అవ్వాల్సిందే. పైగా ఉదయం హడావిడిలో చిటికెలో సులభంగా తయారుచేసుకోవచ్చు. లంచ్ బాక్స్లోకి, బ్రేక్ఫాస్ట్కి ఇది బెస్ట్ ఆప్షన్. మరి ఈ టేస్టీ రెసిపీని ఎలా చేయాలో ఇప్పుడే చూసేయండి!
కావాల్సిన పదార్థాలు:
ఉడికించిన అన్నం: 1 కప్పు
పచ్చి కొబ్బరి తురుము: 1 కప్పు
సోయాకూర (Dill leaves) ఆకు: 1/3 కప్పు
ఉల్లిపాయ తరుగు: ½ కప్పు
నిమ్మరసం: 1 టేబుల్ స్పూన్
నూనె: 4 టేబుల్ స్పూన్లు
పల్లీలు (వేరుశెనగ గుళ్లు): 3 టేబుల్ స్పూన్లు
జీడిపప్పు: 12-15
పచ్చిమిర్చి చీలికలు: 3
ఎండుమిర్చి: 2
ఆవాలు, జీలకర్ర: 1 టీస్పూన్ చొప్పున
పచ్చి శెనగపప్పు, మినపప్పు: 1 టేబుల్ స్పూన్ చొప్పున
మిరియాలు: ½ టీ స్పూన్
ఉప్పు: రుచికి సరిపడా
తయారీ విధానం:
స్టవ్ ఆన్ చేసి పాన్ పెట్టుకుని అందులో నూనె వేడి చేయాలి. నూనె కాగాక జీడిపప్పు, పల్లీలు వేసి దోరగా ఎర్రగా వేయించి ఒక గిన్నెలోకి తీసుకుని పక్కన పెట్టుకోవాలి.
అదే నూనెలో ఆవాలు, జీలకర్ర, శనగపప్పు, మినపప్పు, మిరియాలు, ఎండుమిర్చి వేసి మీడియం మంటపై పోపును కమ్మటి వాసన వచ్చేలా వేగనివ్వాలి.
పోపు వేగిన తర్వాత పచ్చిమిర్చి చీలికలు, ఉల్లిపాయ ముక్కలు, కొద్దిగా ఉప్పు వేసి వేయించాలి. ఉల్లిపాయలు మెత్తబడ్డాక, సోయా కూర వేసి పచ్చివాసన (పసరు వాసన) పోయేంత వరకు 2-3 నిమిషాలు బాగా వేయించుకోవాలి.
సోయా ఆకు వేగాక.. అందులో ముందుగా పొడిపొడిగా ఉడికించి పెట్టుకున్న అన్నం, పచ్చి కొబ్బరి తురుము వేసి మంటను హై-ఫ్లేమ్లో పెట్టి బాగా కలుపుకోవాలి (టాస్ చేయాలి).
ఇవి కూడా చదవండి:
అన్నం బాగా కలిశాక స్టవ్ ఆఫ్ చేయాలి. ఇప్పుడు అందులో ముందుగా వేయించి పెట్టుకున్న జీడిపప్పు, పల్లీలు, నిమ్మరసం వేసి బాగా కలుపుకోవాలి.
అంతే.. ఎంతో గుమగుమలాడే ‘కర్ణాటక స్టైల్ వైట్ చిత్రాన్నం’ రెడీ! వేడివేడిగా తింటే ఆ కొబ్బరి, సోయా ఆకుల ఫ్లేవర్ అద్భుతంగా ఉంటుంది. ఇంకెందుకు ఆలస్యం, రేపు ఉదయం బ్రేక్ఫాస్ట్కి ఇదే ట్రై చేయండి! మీ ఇంట్లో వాళ్ళు కచ్చితంగా మెచ్చుకుంటారు.