మధుమేహ రోగులకు సంజీవని లాంటిది ‘రాగి’.. షుగర్ కంట్రోల్ చేయడంలో భేష్!

ప్రస్తుత రోజుల్లో మారిన జీవనశైలి, ఆహారపు అలవాట్ల వల్ల చిన్న వయసులోనే మధుమేహం (డయాబెటిస్) బారిన పడుతున్న వారి సంఖ్య రోజురోజుకూ పెరుగుతోంది.

షుగర్ వ్యాధి ఒక్కసారి వచ్చిందంటే జీవితాంతం మందులు వాడక తప్పదు. అయితే, కేవలం మందుల వల్లే కాకుండా సరైన ఆహార నియమాలు పాటిస్తేనే ఈ వ్యాధిని అదుపులో ఉంచుకోవచ్చు. లేదంటే ఇతర ఆరోగ్య సమస్యలు తలెత్తే ప్రమాదం ఉంది.

డయాబెటిస్ ఉన్నవారు ముఖ్యంగా ఫైబర్, యాంటీ ఆక్సిడెంట్లు పుష్కలంగా ఉండే ఆహారం తీసుకోవాలని పోషకాహార నిపుణులు సూచిస్తుంటారు. ఆ జాబితాలో ‘రాగులు’ ఎప్పుడూ ముందు వరుసలో ఉంటాయి. తెల్ల బియ్యం, గోధుమల స్థానంలో రాగులను చేర్చుకోవడం వల్ల అద్భుతమైన ప్రయోజనాలు కలుగుతాయి.

రాగులతో మధుమేహులకు కలిగే అద్భుతమైన ఉపయోగాలు:
పోషకాల గని: గోధుమలు, బియ్యంతో పోలిస్తే రాగుల్లో పాలిఫెనాల్స్, కాల్షియం, శరీరానికి అవసరమైన ముఖ్యమైన అమైనో ఆమ్లాలు సమృద్ధిగా ఉంటాయి.

రక్తంలో చక్కెర నియంత్రణ: రాగులతో చేసిన ఆహారం తీసుకున్నప్పుడు, అది జీర్ణమై గ్లూకోజ్‌గా మారడానికి ఎక్కువ సమయం పడుతుంది. దీనివల్ల రక్తంలోకి గ్లూకోజ్ నెమ్మదిగా విడుదలవుతుంది. ఫలితంగా భోజనం తర్వాత షుగర్ లెవెల్స్ అకస్మాత్తుగా పెరగకుండా అదుపులో ఉంటాయి.

ఇన్సులిన్ పనితీరు మెరుగుదల: రాగుల్లో యాంటీ డయాబెటిక్ లక్షణాలు మెండుగా ఉన్నాయి. ఇందులో లభించే మెగ్నీషియం.. ఇన్సులిన్ నిరోధకతను తగ్గించి, ఇన్సులిన్ సెన్సిటివిటీని పెంచుతుంది.

కొలెస్ట్రాల్‌కు చెక్: డయాబెటిస్ ఉన్నవారిలో కొలెస్ట్రాల్ వేగంగా పెరిగే అవకాశం ఉంది. రాగుల్లో ఉండే ఫైబర్ రక్తంలోని చెడు కొలెస్ట్రాల్‌ను తగ్గిస్తుంది. అలాగే త్వరగా ఆకలి వేయకుండా చూస్తుంది.

నీరసం దూరం: షుగర్ పేషెంట్లను తరచుగా వేధించే అలసట, నీరసాన్ని తగ్గించి శరీరానికి తక్షణ శక్తిని అందించడంలో రాగులు ఎంతగానో సహాయపడతాయి.

ఎలా తీసుకోవాలి?

ప్రతిరోజూ కనీసం ఒక స్పూన్ రాగులను ఏదో ఒక రూపంలో ఆహారంలో చేర్చుకోవడం మంచిది.

రాగులను పిండిగా ఆడించుకుని రాగి జావ లేదా రాగి రొట్టెల రూపంలో తీసుకోవచ్చు.

మార్కెట్లో ప్యాకెట్లలో దొరికే పిండిని కొనుగోలు చేయడం కంటే, నేరుగా రాగులను కొని ఇంట్లోనే పిండి పట్టుకోవడం వల్ల పూర్తి పోషకాలు శరీరానికి అందుతాయి.

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com