ఉప్పు, మిరపకాయలతోనే ‘దిష్టి’ ఎందుకు తీస్తారో తెలుసా? తరతరాలుగా వస్తున్న ఈ ఆచారం వెనుక అసలు రహస్యం ఇదే!

మనం ఊరంతా తిరిగి రాగానే ఇంట్లో అమ్మో, నానమ్మో ఉప్పు, ఎండుమిరపకాయలు గుప్పిట్లోకి తీసుకుని మూడుసార్లు తల చుట్టూ తిప్పి పొయ్యిలో వేస్తుంటారు. ఇది మనందరి ఇళ్లలో సర్వసాధారణంగా జరిగేదే!

ఉన్నట్టుండి నీరసంగా అనిపించినా, ఏ పనిలోనైనా ఆటంకాలు ఎదురవుతున్నా ‘దిష్టి తగిలింది’ అని అనుకుంటారు. అయితే, అసలు దిష్టి తీయడానికి ఈ రెండింటినే ఎందుకు వాడతారు? ఇది కేవలం మూఢనమ్మకమేనా లేక దీని వెనుక ఏదైనా సీక్రెట్ ఉందా? ఆ ఆసక్తికరమైన విషయాలు ఇప్పుడు తెలుసుకుందాం.

ఉప్పులోనే ఆ మహిమ ఉందా?
ఉప్పును కేవలం వంటల్లో రుచి కోసమే కాదు, వాస్తు, ఆధ్యాత్మిక పరిహారాల్లోనూ ఎక్కువగా వాడతారు.

ఉప్పుకు చుట్టుపక్కల ఉన్న ‘నెగటివ్ ఎనర్జీ’ని (ప్రతికూల శక్తులను) ఆకర్షించి, తనలోకి పీల్చుకునే అద్భుతమైన గుణం ఉందని ప్రాచీన కాలం నుంచి నమ్ముతున్నారు.

అందుకే మనపై ఉన్న చెడు దృష్టిని, మానసిక ఒత్తిడిని లాగేసుకోవడానికి ఉప్పును గుప్పిట్లో పట్టుకుని దిష్టి తీస్తారు. ఇంట్లో చెడు వైబ్రేషన్స్ తగ్గడానికి కూడా మూలల్లో ఉప్పు పెడుతుంటారు.

చెడును తరిమికొట్టే ‘మిరపకాయ’ ఘాటు
మిరపకాయలకు చెడు శక్తులను నాశనం చేసే శక్తి ఉందని చాలా సంస్కృతులలో ఒక బలమైన నమ్మకం.

మిరపకాయల ఘాటు శరీరానికి చుట్టుకున్న చెడు వైబ్రేషన్స్‌ను బయటకు తరిమేస్తుందని భావిస్తారు.

అందుకే ఏడు ఎండు మిరపకాయలు, కొద్దిగా ఉప్పు కలిపి తల చుట్టూ తిప్పుతారు. దుకాణాలు, ఇళ్ల గుమ్మాలకు నిమ్మకాయలతో పాటు మిరపకాయలు కట్టడానికి కారణం కూడా ఇదే.. నెగటివ్ ఎనర్జీ ఇంట్లోకి రాకుండా అడ్డుకోవడమే దీని వెనుక ఉన్న ఉద్దేశం.

తీసిన దిష్టిని నిప్పులోనే ఎందుకు వేస్తారు?
దిష్టి తీసిన తర్వాత వాటిని నిప్పులో వేయడం వెనుక ఓ ఆధ్యాత్మిక కథ ఉంది. వేదాల ప్రకారం, అగ్నిని అత్యంత పవిత్రమైనదిగా, స్వచ్ఛతకు ప్రతీకగా భావిస్తారు. ఉప్పు, మిరపకాయలు గ్రహించిన నెగటివ్ ఎనర్జీ అగ్నిలో పడి కాలిపోతుందని, తద్వారా దిష్టి తగిలిన వ్యక్తికి ఆ దోషం పూర్తిగా తొలగిపోతుందని విశ్వసిస్తారు.

అసలు ఇందులో సైన్స్ ఉందా?
ఉప్పు, మిరపకాయలతో దిష్టి తీయడం వల్ల లాభాలు ఉన్నాయని నేరుగా ఎలాంటి శాస్త్రీయ ఆధారాలు లేవు. కానీ, సైకాలజీ (మానసిక శాస్త్రం) ప్రకారం.. ఇలాంటి ఆచారాలు మనుషుల్లో ఒక రకమైన మానసిక ప్రశాంతతను ఇస్తాయి. “నాకున్న దిష్టి పోయింది” అన్న భావన, నమ్మకం వారిలో పాజిటివ్ ఎనర్జీని నింపుతాయి.

అప్పుడే పుట్టిన పిల్లలు, కొత్తగా పెళ్లైన జంటలు, కొత్త వాహనం లేదా ఇల్లు కొన్నవారు.. ఇలా ఎవరికైనా నరఘోష తగలకుండా ఉండాలనే ప్రాచీన కాలం నుంచి ఈ ఆచారం పుట్టుకొచ్చింది. ఏది ఏమైనా, “చెడు తొలగిపోయి, మంచి జరగాలి” అన్న పాజిటివ్ ఆలోచనే ఈ సంప్రదాయం వెనుక ఉన్న అసలైన ఉద్దేశం!

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com