ఉదయం హడావిడిలో ఏం చేయాలో తోచట్లేదా? 10 నిమిషాల్లో ఇలా కమ్మని అటుకుల పులిహోర చేయండి!
ఉదయం లేవగానే బ్రేక్ ఫాస్ట్ ఏం చేయాలా అని ఆలోచిస్తున్నారా? లేదా సాయంత్రం వేళ పిల్లలు స్కూల్ నుంచి రాగానే ఏదైనా వేడిగా, కమ్మగా అడిగితే ఏం పెట్టాలా అని కంగారు పడుతున్నారా? అయితే ఎలాంటి హడావుడి లేకుండా కేవలం 10 నిమిషాల్లో అయిపోయే ‘అటుకుల పులిహోర’ (పోహా) చేసి పెట్టండి. టేస్ట్‌కి టేస్ట్, హెల్త్‌కి హెల్త్!
ఇది చేయడం కూడా చాలా సులువు. ఎలా చేయాలో ఇక్కడ చూద్దాం.
కావాల్సిన పదార్థాలు:
అటుకులు – 1 కప్పు
పచ్చిమిర్చి – 3 (చిన్న ముక్కలుగా కట్ చేసుకోవాలి)
ఉల్లిపాయ – 1 (సన్నగా తరగాలి)
పల్లీలు (వేరుశెనగ గుళ్లు) – 2 టేబుల్ స్పూన్లు
పచ్చి బఠాణీ – 3 టేబుల్ స్పూన్లు
జీలకర్ర – అర టీస్పూన్
వెల్లుల్లి తరుగు – అర టీస్పూన్
పసుపు – పావు టీస్పూన్
నిమ్మరసం – 2 టేబుల్ స్పూన్లు
కొత్తిమీర – కొద్దిగా
కరివేపాకు – 2 రెమ్మలు
ఉప్పు – రుచికి సరిపడా
నూనె – తగినంత
తయారీ విధానం:
ముందుగా అటుకులను తీసుకుని నీళ్లలో వేసి శుభ్రంగా కడగాలి. ఒక్క నిమిషం తర్వాత వాటిలోని నీరంతా గట్టిగా పిండేసి, అటుకులను విడివిడిగా ఒక ప్లేట్‌లో పక్కన పెట్టుకోవాలి. (గుర్తుంచుకోండి.. ఎక్కువసేపు నీళ్లలో ఉంచితే అటుకులు మెత్తగా ముద్దలా అయిపోతాయి).
ఇప్పుడు స్టవ్ ఆన్ చేసి కడాయి పెట్టుకుని, తగినంత నూనె వేడి చేయాలి.
నూనె కాగాక జీలకర్ర, పల్లీలు, కరివేపాకు వేసి దోరగా వేయించుకోవాలి.
ఆ తర్వాత అందులోనే సన్నగా తరిగిన ఉల్లిపాయ ముక్కలు, పచ్చిమిర్చి, వెల్లుల్లి తరుగు, పచ్చి బఠాణీ వేసి ఓ 5 నిమిషాల పాటు వేయించాలి. ఇవి వేగాక కొద్దిగా పసుపు వేసి కలపాలి.
ఇప్పుడు మనం ముందుగా నీళ్లు పిండి పక్కన పెట్టుకున్న అటుకులను ఈ తాలింపులో వేసి అంతా కలిసేలా నెమ్మదిగా కలుపుకోవాలి.
చివరిగా మీ రుచికి సరిపడా ఉప్పు, నిమ్మరసం, సన్నగా తరిగిన కొత్తిమీర చల్లుకుని స్టవ్ ఆఫ్ చేయాలి.
అంతే.. వేడివేడిగా, ఎంతో కమ్మగా ఉండే అటుకుల పులిహోర రెడీ! దీన్ని ఇంకాస్త హెల్తీగా, పోషకాలతో నిండి ఉండేలా చేసుకోవాలనుకుంటే, తాలింపులో క్యారెట్, క్యాప్సికమ్ లాంటి కూరగాయల ముక్కలను కూడా వేసుకోవచ్చు. ఇంకెందుకు ఆలస్యం, వెంటనే ట్రై చేసి చూడండి!