సమ్మర్లో పెరుగు త్వరగా పుల్లగా అవుతుందా..? ఇలా చేస్తే ఆ సమస్యే ఉండదు, ఓసారి ట్రై చేయండి!
వేసవికాలం వచ్చేసింది.. ఈ మండుటెండల్లో చల్లటి మజ్జిగ తాగినా, కమ్మటి పెరుగు అన్నం తిన్నా ఆ కిక్కే వేరు. ఎండల వల్ల మన శరీరానికి చలువ చేసే పెరుగును తినడానికి అందరూ ఇష్టపడతారు. కానీ, సమ్మర్లో గృహిణులను వేధించే అతిపెద్ద సమస్య.. పెరుగు త్వరగా పుల్లగా మారిపోవడం. ఉదయం తోడుపెట్టిన పెరుగు మధ్యాహ్నానికే పుల్లగా తయారవుతుంది.
అయితే, కొన్ని చిన్న చిన్న వంటింటి చిట్కాలు పాటిస్తే వేసవిలో కూడా పెరుగు కమ్మగా, ఫ్రెష్గా ఉంటుంది. ఆ టిప్స్ ఏంటో ఇక్కడ తెలుసుకుందాం.
1. తోడు తక్కువగా వేయాలి
చలికాలంతో పోలిస్తే వేసవిలో వాతావరణం వేడిగా ఉంటుంది. కాబట్టి పాలు త్వరగా తోడుకుంటాయి. సమ్మర్లో పాలు తోడు పెట్టేటప్పుడు వేసే మజ్జిగ లేదా పెరుగు (తోడు) చాలా తక్కువ మోతాదులో (అర స్పూన్) వేయాలి. ఎక్కువ వేస్తే పెరుగు త్వరగా పులిసిపోతుంది.
2. పచ్చి కొబ్బరి లేదా అల్లం ముక్క
ఇది చాలా అద్భుతంగా పనిచేసే పాతకాలపు చిట్కా! పాలు తోడుపెట్టే సమయంలో అందులో ఒక చిన్న పచ్చి కొబ్బరి ముక్కను గానీ, పొట్టు తీసిన అల్లం ముక్కను గానీ వేయండి. ఇవి పెరుగును త్వరగా పులిసిపోకుండా అడ్డుకుంటాయి. పెరుగు కూడా కమ్మటి రుచితో ఉంటుంది.
3. మట్టి పాత్రలే బెస్ట్
వేసవిలో పెరుగు తోడు పెట్టడానికి స్టీల్ లేదా ప్లాస్టిక్ పాత్రల కంటే.. మట్టి పాత్రలను (కుండలను) ఉపయోగించడం ఉత్తమం. మట్టి పాత్రలు పెరుగును సహజంగా చల్లగా ఉంచుతాయి. దీనివల్ల అందులోని బ్యాక్టీరియా త్వరగా వృద్ధి చెందదు, పెరుగు పుల్లగా మారదు.
4. గాజు పాత్రలు వాడొచ్చు
ఒకవేళ మీ దగ్గర మట్టి పాత్రలు లేకపోతే, గాజు లేదా సిరామిక్ బౌల్స్ లో పెరుగు తోడుపెట్టండి. లోహపు పాత్రలతో పోలిస్తే వీటిలో పెరుగు ఎక్కువ సేపు ఫ్రెష్గా ఉంటుంది.
5. తోడుకున్న వెంటనే ఫ్రిజ్లో..
వేసవిలో పాలు తోడుకోవడానికి 4 నుంచి 5 గంటల సమయం చాలు. కాబట్టి పెరుగు గట్టిపడిన వెంటనే దాన్ని బయట ఉంచకుండా ఫ్రిజ్లో పెట్టేయాలి. బయటే ఉంచితే ఉష్ణోగ్రత కారణంగా పులిసే ప్రక్రియ వేగవంతం అవుతుంది.
ఎండదెబ్బ తగలకుండా ఉండాలా? అయితే హోటల్ స్టైల్ ‘మసాలా మజ్జిగ’ ఇలా ట్రై చేయండి.. అమృతంలా ఉంటుంది!
6. పాలు ఎలా ఉండాలి?
పాలు మరీ వేడిగా ఉన్నప్పుడు గానీ, మరీ చల్లగా ఉన్నప్పుడు గానీ తోడుపెట్టకూడదు. గోరువెచ్చగా ఉన్నప్పుడు మాత్రమే తోడుపెడితే పెరుగు కమ్మగా వస్తుంది.
ఈ చిన్నపాటి జాగ్రత్తలు తీసుకుంటే ఈ సమ్మర్ మొత్తం కమ్మటి పెరుగును ఆస్వాదించవచ్చు. ఇంకెందుకు ఆలస్యం, ఈసారి పాలు తోడుపెట్టేటప్పుడు ఈ చిట్కాలను కచ్చితంగా ట్రై చేయండి!
గమనిక:ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.