ఇంట్లోనే 100% స్వచ్ఛమైన రోజ్ వాటర్ తయారీ.. ఈ సీక్రెట్ తెలిస్తే ఇక బయట కొనరు!

మార్కెట్లో దొరికే రోజ్ వాటర్‌లో ప్రిజర్వేటివ్స్, కృత్రిమ రంగులు ఉండే అవకాశం ఉంటుంది. కానీ ఎలాంటి ఖర్చు లేకుండా, స్వచ్ఛమైన రోజ్ వాటర్ (Rose Water) ను ఇంట్లోనే చాలా సులభంగా తయారు చేసుకోవచ్చు. ముఖంపై గ్లో పెంచడానికి, ఫేస్ ప్యాక్స్‌లో కలుపుకోవడానికి ఇది అద్భుతంగా పనిచేస్తుంది.

దీన్ని తయారు చేయడానికి ‘స్టీమింగ్ (ఆవిరి) పద్ధతి’ బెస్ట్. దీని ద్వారా వచ్చే రోజ్ వాటర్ చాలా స్వచ్ఛంగా ఉంటుంది.

కావాల్సిన పదార్థాలు
తాజా గులాబీలు: 5 నుండి 6 (నాటు గులాబీలు/పింక్ గులాబీలు అయితే సువాసన, న్యాచురల్ గుణాలు చాలా బాగుంటాయి)
నీళ్లు: గులాబీ రేకులు మునిగేంత (డిస్టిల్డ్ వాటర్ లేదా ఫిల్టర్ నీళ్లు)
ఐస్ ముక్కలు (Ice Cubes): ఒక కప్పు

తయారీ విధానం
ముందుగా గులాబీ పూల నుంచి రేకులను విడదీసి, దుమ్ము లేకుండా నీటితో ఒకసారి నెమ్మదిగా కడుక్కోవాలి.

ఒక వెడల్పాటి, లోతైన గిన్నె (పాత్ర) తీసుకోండి. దాని మధ్యలో ఒక చిన్న స్టాండ్ లేదా ఒక చిన్న గిన్నెను బోర్లించి పెట్టండి. ఆ స్టాండ్ పైన రోజ్ వాటర్ కలెక్ట్ చేసుకోవడానికి మరో ఖాళీ గిన్నెను ఉంచండి.

ఇప్పుడు కింద ఉన్న పెద్ద గిన్నెలో (ఖాళీ గిన్నె చుట్టూ) గులాబీ రేకులను వేయండి. ఆ రేకులు మునిగేలా మాత్రమే కొద్దిగా నీళ్లు పోయండి. (మధ్యలో ఉన్న ఖాళీ గిన్నెలోకి నీళ్లు, రేకులు వెళ్లకూడదు).

పెద్ద గిన్నెపై మూతను తిరగేసి (ఉల్టా) పెట్టండి. (ఇలా చేయడం వల్ల ఆవిరి మూతకు తగిలి, ఆ వాలుకి కచ్చితంగా మధ్యలోని గిన్నెలో బిందువులుగా పడుతుంది).

స్టవ్ ఆన్ చేసి, మంటను పూర్తిగా సిమ్‌లో (Low Flame) ఉంచండి. ఇప్పుడు తిరగేసి పెట్టిన మూత పైన ఐస్ ముక్కలను వేయండి.

లోపల నీరు మరిగి ఆవిరి పైకి వస్తుంది. పైన ఐస్ ఉండటం వల్ల ఆవిరి వెంటనే చల్లబడి, నీటి బిందువులుగా (Condensation) మారి మధ్యలో ఉన్న ఖాళీ గిన్నెలో పడుతుంది. మూత మీద ఐస్ కరిగితే ఆ నీటిని తీసేసి మళ్లీ కొత్త ఐస్ వేయండి.

ఒక 20-30 నిమిషాల తర్వాత స్టవ్ ఆఫ్ చేయండి. మధ్యలోని గిన్నెలో కలెక్ట్ అయిన నీళ్లే 100% స్వచ్ఛమైన రోజ్ వాటర్. ఇది పూర్తిగా చల్లారాక ఒక స్ప్రే బాటిల్ లేదా గాజు సీసాలో నిల్వ చేసుకోండి.

న్యాచురల్ రోజ్ వాటర్ ఉపయోగాలు:
స్కిన్ టోనర్: రోజూ ఉదయం, రాత్రి పడుకునే ముందు న్యాచురల్ స్కిన్ టోనర్‌లాగా ముఖానికి స్ప్రే చేసుకుంటే చర్మం టైట్‌గా, ఫ్రెష్‌గా మారుతుంది.

ఫేస్ ప్యాక్స్ కోసం: బియ్యం పిండి, ముల్తానీ మట్టి లాంటివి కలుపుకునేటప్పుడు నీళ్లకు బదులుగా ఈ రోజ్ వాటర్ వాడితే డబుల్ గ్లో వస్తుంది.

షెల్ఫ్ లైఫ్: దీన్ని ఫ్రిజ్‌లో పెట్టుకుంటే నెల రోజుల పాటు పాడవకుండా ఫ్రెష్‌గా ఉంటుంది.

గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com