Sweet Potato Pulusu: అన్నంలోకి అమృతంలా ఉండే ‘తమిళనాడు స్టైల్’ చిలగడదుంప పులుసు..

Sweet Potato pulusu:ఎప్పుడూ రొటీన్‌గా చేసుకునే పల్చటి పులుసు కూరలు బోర్ కొట్టాయా? అయితే కాస్త తీపి, పులుపు, ఘాటు కలగలిపిన చిక్కటి ‘చిలగడదుంప పులుసు’ (Sweet Potato Pulusu) ట్రై చేసి చూడండి.

అచ్చం తమిళనాడు స్టైల్‌లో స్పైసీగా, కమ్మగా ఉండే ఈ వంటకం వేడివేడి అన్నంలోకి కలుపుకుని తింటే ఆ రుచే వేరు. మరి ఇంకెందుకు ఆలస్యం, దీన్ని సులభంగా ఎలా చేసుకోవాలో చూసేయండి.

కావాల్సిన పదార్థాలు:
చిలగడ దుంపలు – 300 గ్రాములు

స్పెషల్ మసాలా పొడి కోసం: ఆవాలు – ½ టీస్పూన్, మెంతులు – ¼ టీస్పూన్, జీలకర్ర – 1 టీస్పూన్, మిరియాలు – ½ టీస్పూన్, పచ్చి లేదా ఎండు కొబ్బరి – ¼ కప్పు

పులుసు కోసం:
నూనె – 6 టేబుల్ స్పూన్లు
ఆవాలు – ½ టీస్పూన్
ఎండుమిర్చి – 4
సాంబార్ ఉల్లిపాయలు (చిన్నవి) – 25

వెల్లుల్లి రెబ్బలు – 10 నుంచి 12
కరివేపాకు – 2 రెబ్బలు
టమాటా ముక్కలు – 1 కప్పు
కారం – ¾ టీస్పూన్
ధనియాల పొడి – 1 టేబుల్ స్పూన్
చింతపండు పులుసు – 100-125 ml
నీళ్లు – అర లీటరు
ఉప్పు – రుచికి సరిపడా

తయారీ విధానం:
ముందుగా స్టవ్ మీద పాన్ పెట్టి, మసాలా పొడి కోసం తీసుకున్న ఆవాలు, మెంతులు, జీలకర్ర, మిరియాలు, కొబ్బరి వేసి దోరగా వేయించుకోవాలి. ఇవి చల్లారాక మిక్సీ పట్టి మెత్తటి పొడిలా చేసి పక్కన పెట్టుకోవాలి.

ఇప్పుడు మందపాటి గిన్నెలో లేదా బాండీలో నూనె వేడి చేయాలి. అందులో ఆవాలు, ఎండుమిర్చి, కరివేపాకు, సాంబార్ ఉల్లిపాయలు, వెల్లుల్లి రెబ్బలు వేసి.. ఉల్లిపాయలు మెత్తబడి రంగు మారేంతవరకు బాగా వేయించాలి.

ఉల్లిపాయలు చక్కగా వేగిన తర్వాత, టమాటా ముక్కలు మరియు తగినంత ఉప్పు వేసి గుజ్జులా అయ్యేవరకు మగ్గించుకోవాలి.

టమాటాలు మెత్తబడ్డాక, అందులో కారం, ధనియాల పొడి వేసి బాగా కలపాలి. ఆపై ముందుగా తీసిపెట్టుకున్న చింతపండు పులుసు పోసి ఒక పొంగు వచ్చే వరకు మరగనివ్వాలి.

పులుసు మరుగుతున్నప్పుడు చిలగడదుంప ముక్కలు, అర లీటరు నీళ్లు పోసి కలపాలి. ఇందులోనే మనం ముందుగా మిక్సీ పట్టుకున్న ‘స్పెషల్ మసాలా పొడి’ని కూడా వేసి కలుపుకోవాలి. ఇప్పుడు మూత పెట్టి సన్న మంట మీద సుమారు 30 నిమిషాల పాటు ఉడికించాలి.

పులుసు చిక్కబడి, దుంపలు మెత్తగా ఉడికిన తర్వాత.. పైనుంచి కొద్దిగా కొత్తిమీర చల్లుకుని స్టవ్ ఆఫ్ చేసుకుంటే చాలు. ఘుమఘుమలాడే ‘తమిళనాడు స్టైల్ చిలగడదుంప పులుసు’ రెడీ!

చిట్కా: దీన్ని వేడివేడి అన్నంలోకి నెయ్యి వేసుకుని తింటే రుచి అమోఘంగా ఉంటుంది. ఈ వీకెండ్‌లో తప్పకుండా ట్రై చేయండి!

గమనిక:ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com