సాయంత్రం వేళ కరకరలాడే ఉల్లిపాయ పకోడీ.. ఇలా చేస్తే స్వీట్ షాప్ రుచి మీ ఇంట్లోనే!

Onion pakoda:సాయంత్రం కాగానే వేడి వేడి కాఫీ లేదా టీతో పాటు ఏదైనా కరకరలాడే చిరుతిండి ఉంటే ఆ మజానే వేరు. అలాంటి స్నాక్స్ జాబితాలో మొదటి స్థానంలో ఉండేది ‘ఉల్లిపాయ పకోడీ’. హోటల్స్‌లో, స్వీట్ షాపుల్లో దొరికే ఆ కరకరలాడే పకోడీలను మనం ఇంట్లోనే చాలా ఈజీగా ఎలా తయారు చేసుకోవాలో ఇప్పుడు చూద్దాం.

కావాల్సిన పదార్థాలు:
ఉల్లిపాయలు: 300 గ్రాములు (పొడవుగా కోసినవి)
శనగపిండి: 150 గ్రాములు
బియ్యం పిండి: 2 టేబుల్ స్పూన్లు (ఇది పకోడీ కరకరలాడటానికి కీలకం)
అల్లం వెల్లుల్లి పేస్ట్: 1 టేబుల్ స్పూన్
కారం: 1 టేబుల్ స్పూన్

జీలకర్ర: 1 టేబుల్ స్పూన్
ధనియాలు: 1 టేబుల్ స్పూన్
గరం మసాలా: 1 టేబుల్ స్పూన్
ధనియాల పొడి: 1 టేబుల్ స్పూన్
కరివేపాకు: 3 రెబ్బలు
పచ్చిమిర్చి: 2 (చీలికలు)
ఉప్పు: రుచికి సరిపడా
నీరు: కేవలం 1 టేబుల్ స్పూన్

తయారీ విధానం:
ముందుగా ఒక వెడల్పాటి గిన్నెలో ఉల్లిపాయ ముక్కలు, పచ్చిమిర్చి ముక్కలు తీసుకోండి. అందులో ఉప్పు, కారం, అల్లం వెల్లుల్లి పేస్ట్, జీలకర్ర, ధనియాలు, గరం మసాలా, ధనియాల పొడి వేయండి.

ఇప్పుడు చేత్తో బాగా నలుపుతూ కలపండి. ఇలా చేయడం వల్ల ఉల్లిపాయల్లోని తేమ బయటకు వచ్చి పకోడీలకు మంచి రుచిని ఇస్తుంది.

ఇప్పుడు ఇందులో శనగపిండి, బియ్యం పిండి వేసి కలపండి. చివరగా కేవలం ఒక్క స్పూన్ నీళ్లు చల్లి, పిండి ఉల్లిపాయలకు గట్టిగా పట్టేలా చూసుకోండి.

స్టవ్ మీద కడాయి పెట్టి నూనె వేడి చేయండి. నూనె బాగా కాగిన తర్వాత, ఉల్లిపాయ మిశ్రమాన్ని మరీ పల్చగా కాకుండా, కొంచెం ముద్దలుగా పకోడీల్లా వేయండి.

మంటను మధ్యస్థంగా ఉంచి, పకోడీలను మంచి రంగు వచ్చే వరకు కరకరలాడేలా వేయించుకోవాలి. అంతే.. నోరూరించే క్రిస్పీ ఉల్లిపాయ పకోడీ రెడీ!

పకోడీ కరకరలాడాలంటే చిన్న చిట్కా:
పకోడీలు మెత్తబడకుండా ఎక్కువ సేపు కరకరలాడుతూ ఉండాలంటే, పిండి కలిపేటప్పుడు నీళ్లను చాలా తక్కువగా వాడాలి. ఉల్లిపాయల నుండి వచ్చే తేమతోనే పిండిని కలుపుకోవడానికి ప్రయత్నించండి.

ఈ సాయంత్రం మీ ఇంట్లో టీ టైమ్ స్నాక్‌గా ఈ పకోడీలను ట్రై చేయండి, ఇంట్లో వారంతా కచ్చితంగా ఇష్టంగా లాగించేస్తారు!