10 నిమిషాల్లో రెడీ అయ్యే ఈ స్నాక్ తిన్నారంటే.. మళ్లీ మళ్లీ కావాలంటారు!
చల్లటి వాతావరణంలో వేడివేడిగా, కరకరలాడే స్నాక్స్ తినాలనిపిస్తుందా? అయితే గంటల తరబడి వంటగదిలో కష్టపడాల్సిన అవసరం లేదు. కేవలం 10 నిమిషాల్లో సులభంగా తయారు చేసుకునే స్వీట్ కార్న్ తోటకూర వడలు మీకు బెస్ట్ ఆప్షన్.
బయట క్రిస్పీగా, లోపల సాఫ్ట్గా ఉండే ఈ వడలు పిల్లల నుంచి పెద్దల వరకు అందరికీ భలే నచ్చుతాయి. పైగా స్వీట్ కార్న్, తోటకూర కలయిక వల్ల ఇది ఆరోగ్యానికి కూడా చాలా మంచిది. వేడిగా తింటే కరకరలాడుతూ, చల్లారాక ఎంతో మృదువుగా ఉండే ఈ టేస్టీ రెసిపీని ఎలా చేయాలో ఇప్పుడు చూద్దాం.
కావలసిన పదార్థాలు:
లేత స్వీట్ కార్న్ గింజలు: 2.5 కప్పులు
లేత తోటకూర ఆకులు: 2.5 కప్పులు (సన్నగా తరిగినవి)
ఉల్లిపాయ తరుగు: 1/2 కప్పు
బియ్యం పిండి: 1/4 కప్పు
పచ్చిమిర్చి: 5
అల్లం: 1 అంగుళం ముక్క
వెల్లుల్లి రెబ్బలు: 7
జీలకర్ర: 1 టీస్పూన్
సోంపు: 1 టీస్పూన్
ఉప్పు: రుచికి సరిపడా
నూనె: డీప్ ఫ్రై చేయడానికి సరిపడా
తయారీ విధానం:
ముందుగా మిక్సీ జార్లో అల్లం, వెల్లుల్లి, జీలకర్ర, సోంపు, పచ్చిమిర్చి, సరిపడా ఉప్పు మరియు స్వీట్ కార్న్ గింజలు వేసుకోవాలి.
ఇందులో నీళ్లు అస్సలు పోయకూడదు. నీళ్లు లేకుండానే కాస్త బరకగా (కోర్స్గా) మరియు మందపాటి పేస్ట్లా మిక్సీ పట్టుకుని ఒక గిన్నెలోకి తీసుకోవాలి.
ఇప్పుడు ఆ మిశ్రమంలో సన్నగా తరిగిన ఉల్లిపాయ ముక్కలు, తోటకూర ఆకులు, బియ్యం పిండి వేసి బాగా కలపాలి.
తోటకూరను వేసి గట్టిగా పిసికి కలపకూడదు. అలా చేస్తే ఆకుల్లోని నీరు బయటకు వచ్చి పిండి పల్చగా, జారుగా మారుతుంది. కాబట్టి పైపైన మృదువుగా కలపాలి.
స్టవ్ మీద కడాయి పెట్టి డీప్ ఫ్రైకి సరిపడా నూనె వేడి చేయాలి.
నూనె బాగా వేడెక్కాక, చేతికి కొద్దిగా నూనె రాసుకుని.. పిండి మిశ్రమాన్ని చిన్న చిన్న ఉండలుగా తీసుకుని అరచేతిలో వడల్లా (గారెల్లా) వత్తుకోవాలి.
వీటిని కాగుతున్న నూనెలో వేసి, మంటను మీడియం ఫ్లేమ్లో ఉంచి రెండు వైపులా ఎర్రగా, కరకరలాడేలా వేయించుకుని బయటకు తీయాలి.
సర్వింగ్ టిప్: వేడివేడి స్వీట్ కార్న్ తోటకూర వడలు రెడీ! వీటిని అల్లం పచ్చడి లేదా టొమాటో కెచప్తో నంజుకుని తింటే రుచి అద్భుతంగా ఉంటుంది. ఇంకెందుకు ఆలస్యం, ఈ రోజే మీ ఇంట్లో ట్రై చేయండి!