అప్పటికప్పుడు దేవుడికి నైవేద్యం పెట్టాలా? అయితే 10 నిమిషాల్లో నోట్లో కరిగిపోయే ‘రవ్వ అప్పాలు’ ఇలా చేసేయండి!

పండగ పబ్బాల సమయంలో ఇంట్లో హడావిడి ఎక్కువగా ఉంటుంది. దేవుడికి నైవేద్యం కోసం ఏదైనా స్వీట్ చేయాలంటే సమయం సరిపోకపోవచ్చు. అలాగే అప్పుడప్పుడు స్వీట్ తినాలనిపించినా ఎక్కువ సమయం వెచ్చించలేం.

అలాంటి సమయాల్లో ఇంట్లో ఉండే బొంబాయి రవ్వతో 10 నిమిషాల్లో చాలా సులభంగా, ఎంతో రుచిగా ఉండే ‘రవ్వ అప్పాలు’ తయారు చేసుకోవచ్చు. పైన కరకరలాడుతూ, లోపల సాఫ్ట్ గా ఉండే ఈ స్వీట్ ఎలా చేయాలో పక్కా కొలతలతో ఇప్పుడు చూద్దాం.

కావలసిన పదార్థాలు:
బొంబాయి రవ్వ (సూజీ): 1 కప్పు
నీళ్లు: 2 కప్పులు
బెల్లం తురుము (లేదా చక్కెర): 1 కప్పు (స్వీట్ కొంచెం ఎక్కువ కావాలనుకునేవారు ఒకటిన్నర కప్పు వేసుకోవచ్చు)
యాలకుల పొడి: అర టీస్పూన్
నెయ్యి: 2 టేబుల్ స్పూన్లు
నూనె: డీప్ ఫ్రైకి సరిపడా

తయారీ విధానం:
ముందుగా స్టవ్ ఆన్ చేసి ఒక మందపాటి కడాయి పెట్టుకుని అందులో 2 కప్పుల నీళ్లు పోసి మరిగించాలి. నీళ్లు మరుగుతున్నప్పుడు మంటను సిమ్‌లో పెట్టి.. 1 కప్పు బొంబాయి రవ్వను కొద్దికొద్దిగా పోస్తూ ఉండలు కట్టకుండా కలుపుకోవాలి.

రవ్వ దగ్గరపడి పిండి ముద్దలా అయ్యాక (సుమారు 2-3 నిమిషాల్లోనే అవుతుంది), అందులో 1 కప్పు బెల్లం తురుము వేసి బాగా కలపాలి. బెల్లం కరిగి రవ్వతో కలిసిపోయి మళ్లీ కాస్త పలుచగా అవుతుంది.

ఇప్పుడు అందులో అర టీస్పూన్ యాలకుల పొడి, 2 టేబుల్ స్పూన్ల నెయ్యి వేసి బాగా కలపాలి. ఈ మిశ్రమం కడాయికి అంటుకోకుండా ఒక ముద్దలా దగ్గరపడే వరకు ఉడికించి స్టవ్ ఆఫ్ చేసుకోవాలి.

ఈ మిశ్రమాన్ని ఒక ప్లేట్‌లోకి తీసుకుని కాస్త చల్లారనివ్వాలి. చేతితో పట్టుకునేంత వేడి ఉన్నప్పుడు.. చేతికి కొద్దిగా నెయ్యి రాసుకుని ఈ పిండిని చపాతీ పిండిలా మెత్తగా కలుపుకోవాలి.

ఇప్పుడు చేతికి నెయ్యి రాసుకుని కొద్దికొద్దిగా పిండిని తీసుకుంటూ చిన్న చిన్న బాల్స్ లా చేసుకోవాలి. వాటిని అరచేతిలో లేదా ఒక కవర్ మీద పెట్టి గుండ్రంగా, మరీ పల్చగా కాకుండా కాస్త మందంగా ఉండేలా అప్పాల్లా వత్తుకోవాలి.

స్టవ్ మీద డీప్ ఫ్రైకి సరిపడా నూనె పెట్టుకుని వేడి చేయాలి. నూనె మీడియం వేడిలో ఉన్నప్పుడు వత్తుకున్న అప్పాలను ఒక్కొక్కటిగా వేయాలి.

వెంటనే గరిటె పెట్టకుండా, ఒక నిమిషం ఆగి అటూ ఇటూ తిప్పుతూ రెండు వైపులా గోల్డెన్ బ్రౌన్ కలర్ వచ్చే వరకు మీడియం మంట మీదే వేయించుకోవాలి.

అంతే! ఎంతో రుచికరమైన, కమ్మని ‘ఇన్‌స్టంట్ రవ్వ అప్పాలు’ రెడీ. వీటిని దేవుడికి నైవేద్యంగా సమర్పించవచ్చు లేదా వేడి వేడిగా పిల్లలకు స్నాక్ గా కూడా ఇవ్వవచ్చు.

చిట్కా : అప్పాలను వేయించేటప్పుడు మంటను మరీ హై ఫ్లేమ్‌లో పెట్టకూడదు, అలా పెడితే పైన మాడిపోయి లోపల పచ్చిగా ఉంటాయి. మీడియం మంటపైనే వేయిస్తే పైన క్రిస్పీగా, లోపల సాఫ్ట్ గా చాలా బాగా వస్తాయి.

గమనిక:ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.

Source: chaipakodi.com