కరకరలాడే “ఉల్లిపాయ పకోడి”.. టీ టైమ్లో బండి మీద దొరికే రుచితో ఇంట్లోనే ఇలా చిటికెలో చేసేయండి!
సాయంత్రం చల్లటి గాలి వీస్తున్నప్పుడు.. వేడి వేడి టీ తాగుతూ ఏదైనా కరకరలాడే స్నాక్ తినాలనిపించడం సహజం. అటువంటి సమయంలో వెంటనే గుర్తొచ్చేది ‘ఉల్లిపాయ పకోడి’.
బండి మీద దొరికే పకోడి ఎంత రుచిగా, క్రిస్పీగా ఉంటుందో.. అదే రుచితో, అదే కరకరలాడేలా ఇంట్లోనే చాలా సులభంగా తయారు చేసుకోవచ్చు. అదెలాగో ఇప్పుడు పక్కా కొలతలతో తెలుసుకుందాం.
కావలసిన పదార్థాలు:
ఉల్లిపాయలు: 3 పెద్దవి (పొడవుగా, సన్నగా కట్ చేసుకోవాలి)
శనగపిండి: 1 కప్పు
బియ్యం పిండి: పావు కప్పు (క్రిస్పీగా రావడం కోసం)
పచ్చిమిర్చి: 3 లేదా 4 (సన్నగా తరిగినవి)
అల్లం వెల్లుల్లి పేస్ట్: 1 టీస్పూన్ (లేదా సన్నగా తరిగిన అల్లం, వెల్లుల్లి ముక్కలు)
కరివేపాకు: 2 రెమ్మలు (సన్నగా తరుగుకోవాలి)
కొత్తిమీర: కొద్దిగా
కారం: అర టీస్పూన్
ఉప్పు: రుచికి సరిపడా
జీలకర్ర లేదా వాము: అర టీస్పూన్ (చేతితో నలిపి వేసుకోవాలి)
వేడి నూనె: 1 టేబుల్ స్పూన్ (పిండిలో కలుపుకోవడానికి)
నూనె: డీప్ ఫ్రైకి సరిపడా
తయారీ విధానం:
ముందుగా ఒక పెద్ద గిన్నెలో పొడవుగా కట్ చేసుకున్న ఉల్లిపాయ ముక్కలు వేసుకోవాలి. అందులో రుచికి సరిపడా ఉప్పు వేసి, చేతితో ఉల్లిపాయలను బాగా నలుపుతూ కలపాలి. ఇలా చేయడం వల్ల ఉల్లిపాయల్లోని నీరు బయటకు వస్తుంది.
ఇప్పుడు ఇందులో సన్నగా తరిగిన పచ్చిమిర్చి, అల్లం వెల్లుల్లి పేస్ట్, కరివేపాకు, కొత్తిమీర, కారం, వాము వేసి మరోసారి బాగా కలుపుకోవాలి.
ఆ తర్వాత శనగపిండి, బియ్యం పిండి వేసి ఉల్లిపాయలకు బాగా పట్టేలా కలపాలి. ముఖ్య గమనిక: ఇందులో నీళ్లు పోయకూడదు. ఉల్లిపాయల్లో వచ్చిన నీరు సరిపోతుంది. పిండి పొడి పొడిగానే ఉండాలి.
పకోడీలు కరకరలాడుతూ రావాలంటే కలుపుకున్న ఈ పిండి మిశ్రమంలో ఒక టేబుల్ స్పూన్ బాగా వేడి చేసిన నూనె వేసి కలపాలి. (అవసరమైతేనే ఒక్క చెంచా నీళ్లు చల్లుకోండి).
స్టవ్ ఆన్ చేసి డీప్ ఫ్రైకి సరిపడా నూనె పెట్టుకోవాలి. నూనె బాగా వేడెక్కిన తర్వాత, మంటను మీడియం ఫ్లేమ్లో ఉంచి.. పిండిని ముద్దలా కాకుండా, విడివిడిగా (పొడి పొడిగా) నూనెలో వేసుకోవాలి.
పకోడీలను వెంటనే కదపకుండా, ఒక నిమిషం ఆగి అటూ ఇటూ తిప్పుతూ గోల్డెన్ బ్రౌన్ కలర్ (బంగారు వర్ణం) వచ్చే వరకు వేయించుకుని ఒక ప్లేట్లోకి తీసుకోవాలి.
ఇవి కూడా చదవండి:
అంతే.. ఎంతో రుచికరమైన, కరకరలాడే స్ట్రీట్ స్టైల్ ‘ఉల్లిపాయ పకోడి’ రెడీ! వేడి వేడి టీ తో ఈ పకోడీలను ఆస్వాదిస్తే ఆ మజాయే వేరు.
చిట్కా : బియ్యం పిండి వాడటం వల్ల పకోడీలు చల్లారిన తర్వాత కూడా మెత్తబడకుండా ఎక్కువసేపు క్రిస్పీగా ఉంటాయి. అలాగే డీప్ ఫ్రై చేసేటప్పుడు నూనె బాగా వేడిగా ఉన్నప్పుడే పకోడీలు వేయాలి.
గమనిక:ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు ‘chaipakodi’ బాధ్యత వహించదని గమనించగలరు.
Source: chaipakodi.com